ULLÍ ShAYÍRǴA HÚRMET

Usı jıldıń 17-may kúni Berdaq atındaǵı Qaraqalpaq mámleketlik universitetinde Túrkmen tili hám ádebiyatı kafedrası tárepinen XVIII ásir túrkmen klassik shayırı Maqtımqulı Pıraǵınıń 300 jıllıǵına arnalǵan «Tuwısqan xalıqlar doslıǵın bekkemlewde Maqtımqulı dóretiwshiliginiń ornı» atamasındaǵı ilimiy-ámeliy konferenciya bolıp ótti. Konferenciyaǵa universitetimizdiń professor-oqıtıwshıları, student-jaslar hám Qaraqalpaqstan Respublikası Milliy mádeniyat oraylarınan, onlayn tárizde birqansha miymanlar qatnastı. Ilimiy-ámeliy konferenciyanı universitetimizdiń ilimiy isler hám innovaciyalar boyınsha prorektorı Izimbet Turdımambetov alıp bardı. Konferenciya úsh basqıshta dawam etti. Onıń birinshi basqıshı milletler ara tatıwlıq, dos-tuwısqanlıq, milliy úrp-ádet hám de túrli milletlerdiń milliy mádeniyatın sáwlelendiretuǵın kórgizbeler, ekinshi basqıshında Maqtımqulınıń ómiri, dóretiwshiligi, shayır shıǵarmalarınıń mánis-mazmunı, ideya-tematikası, tuwısqan xalıqlar ádebiyatında shayır dóretiwshiliginiń úyreniliwi hám kórkem awdarmaları, Maqtımqulı dóretiwshiliginiń tuwısqan xalıqlar ádebiyatlarınıń bir-birine jaqınlasıwında kópir xızmetin atqaratuǵını haqqında Ózbekstan jazıwshılar Awqamı aǵzaları A.Ótepbergenov, S.Ibragimov, Túrkmen tili hám ádebiyatı kafedrası baslıǵı professor O.Gaylieva, ózbek tili hám ádebiyatı kafedrası docenti Z.Kabulova, Nókis mámleketlik pedagogikalıq institutı ózbek ádebiyatı kafedrasınıń professorı F.Sapaevalar óz bayanatları menen qatnastı.

Bunnan keyin bugingi bayram ilaj benen qutlıqlaw ushın professor Q.Járimbetov, professor T.Keruenov hám de onlayn tárizde qatnasqan Tashkent medicina institutınıń professor-oqıtıwshısı filologiya ilimleriniń doktorı G.Kurambaeva, sonday-aq, Milliy mádeniyat oraylarınıń aǵzaları sózge shıqtı. Konferenciyanıń úshinshi basqıshı kórkem bólim, saxnalıq kórinisleri menen dawam etti. Bunda universitetimizdiń student-jasları tárepinen Maqtımqulınıń ustazı esaplanatuǵın ullı shayır Alisher Nawayınıń, Maqtımqulını ózine ustaz dep bilgen qaraqalpaq shayırı Berdaqtıń, qazaq shayırı Abay Qunanbaevtıń ádebiy obrazlarınıń janlandırılǵan saxnalıq kórinisi, sonday-aq, shayırdıń ádebiy miyrasınan alınǵan qosıqları kórkemlep oqıldı, baqsılar tárepinen atqarılǵan qosıqlar ilajǵa qatnasqan miymanlardıń itibarına usınıldı. Ilaj sońında konferenciyaǵa belsendi qatnasqan student-jaslar, milliy mádeniyat oray aǵzaları universitet rektorı tárepinen xoshametledi.