Usı jıldıń 11-aprel kúni Prezident Sh.Mirziyoevtıń Jaslar menen islesiwdiń jańasha sistemasın engiziw boyınsha áhmiyetli wazıypalarǵa baǵıshlanǵan jıynalısı bolıp ótken edi. Júrt basshımızdıń ótkergen jıynalısında jaslar menen islesiwdiń jańa basqıshlarınıń mexanizmi jolǵa qoyılǵanlıǵı atap ótildi. Ásirese, joqarı oqıw orınlarındaǵı student-jaslar menen ruwxıy-aǵartıwshılıq ilajların kúsheytiw, jaslardıń bos waqıtların mazmunlı ótkeriw, olardı kásipke oqıtıw arqalı bántligin támiyinlew hám isbilermenlikti jolǵa qoyıw niyetindegi jaslarǵa biznes baslawdıń birinshi qádemleri haqqında túsinik beriwshi oqıw seminarlar shólkemlestiriw máseleleri reje belgilengen edi. Respublikamız boylap joqarı oqıw dárgaylarında may ayında dawam etip atırǵan «Studentler festivalı» sheńberinde universitettiń Jaslar menen islesiw, ruwxıylıq hám aǵartıwshılıq isleri bólimi tárepinen usı jıldıń 18-may kúni universitettıń Mádeniyat sarayında Qaraqalpaqstandaǵı tájriybeli isbilermenler, ataqlı brendlerge tiykar salǵan biznes wákilleri qatnasıwında «Biznes marafon» ótkerildi. Ushırasıwda “Kushmag Nukus” JShJ direktorı Kumekov Marat, “Alpamis stomadent” JShJ direktorı Jolshimova Muhabbat, “Nano kovrochistka” JShJ direktorı Pirimbetov Quwat, “XUXO xizmetler orayi” JShJ direktorı Adilbekov Aziz, “Deya Nukus” JShJ direktorı Kaipanov Azamat, “Jaslar keleshegimiz” isbilermenlerdi qollap-quwatlaw fondı qánigesi Redjepova Gauxar, Ózbekstan Sawda-sanaat palatası Qaraqalpaqstan basqarması qánigesi Bektursınova Dilnazlar qatnastı. Isbilermenler dáslep kárxanalarınıń jumısları haqqında maǵlıwmat berdi. Sonnan soń, student-jaslar menen ashıq sáwbetlesiw ótkerildi. Ótkerilgen ushırasıwda biznesti baslawdıń dáslepki qádemleri, háreketleri dawamında júz bergen qıyınshılıqları hám mashqalalardı sheshiw jolları boyınsha túsinikler berip ótti. Ushırasıw dawamında isbilermen bolıwdı qálewshi student-jaslarǵa másláhátler berildi hám motivaciyalıq pikirler menen olarǵa áwmetler tiledi. Ushırasıwdıń sońǵı bóliminde “Deya Nukus” JShJ direktorı A.Kaipanov jaslarǵa «Bizneske birinshi qádem» temasında seminar-trening ótkerdi. Universitet student-jasları ózleriniń qızıqtırǵan sorawlarına isbilermenlerden juwap aldı.
