Elimizde futbol eń ǵalabalıq sport túri esaplanadı. Prezidentimiz tárepinen talantlı futbolshılardı tańlaw hám tayarlawdıń úzliksizligin támiyinlew, bul tarawdı rawajlandırıw boyınsha baqsha hám máhállelerde «Ǵalabalıq futbol», orta tálimde «Mekteplerde futbol» hám de joqarı oqıw orınlarında «Studentler ligası» dástúrlerin engiziw wazıypası belgilep berilgen edi. Usı múnásibet penen usı jıldıń 17-18-may kúnleri Dene mádeniyatı fakulteti studentleri arasında kishi futbol boyınsha fakultet birinshiligi ótkerildi. Jarısqa jámi 36 komanda qatnastı. Jarıs qızǵın bellesiwlerge bay bolıp, jaslardıń futbolǵa bolǵan qızıǵıwshılıǵı hám olardıń sport sheberlikleri sınaldı.
Jarısqa tájiriybeli sportshılar, dene mádeniyatı teoriyası hám metodikası kafedrası professor-oqıtıwshıları P.Qaypnazarov, M.Abdimuratov, M.Utepov, S.Eliusinov, I.Shaniyazovlar tóreshilik etti. Jarıs tóreshiler tárepinen tárepinen ádil bahalanıp, I-orındı dene mádeniyatı tálim baǵdarınıń 301-topar studentleri, II-orındı dene mádeniyatı tálim baǵdarınıń 4-A-topar studentleri, III-orındı dene mádeniyatı tálim baǵdarınıń 312-topar studentleri jeńip alıwǵa miyasar boldı. Jarıs jeńimpazları shólkemlestiriwshiler tárepinen tayarlanǵan diplomlar hám estelik sawǵaları menen sıylıqlandı. Ótkerilgen jarıstıń maqseti studentler arasında sporttıń kishi futbol túri boyınsha jarıs ótkeriw arqalı student-jaslar arasında salamat turmıs tárizin qáliplestiriw, universitet kóleminde sporttıń kishi futbol sport túrin rawajlandırıw hám en jaydırıw, olardıń sport sheberligin asırıw, qábiletli futbolshı studentlerdi anıqlaw hám de universitetimizdiń kishi futbol boyınsha saylandı komandası quramın kóbeytiw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
