Ózbekstan Respublikası Ilimler Akademiyası V.I.Romanovskiy atındaǵı Matematika institutınıń direktorı, Ózbekstan qaharmanı, akademik Shavkat Abdullaevich Ayupovtıń Qaraqalpaqstandaǵı xızmet saparı Nókis qalasındaǵı Prezident bilimlendiriw orınları agentligine qaraslı Prezident mektebinde dawam etti. Akademik Sh.A. Ayupov ol jerde mektep adminstraciyası menen ushırasıp, mekteptiń búgingi imkaniyatları, jetiskenlikleri hám mashqalaları haqqında sáwbetlesti.
Bunnan soń mekteptiń zamanagóy keń zalında pitkeriwshiler menen ushırasıw keshesi shólkemlestirildi. Álbette Prezident mektebine Qaraqalpaqstannıń eń ziyrek hám bilimli oqıwshıları tańlaw tiykarında qabıllanǵan, sonlıqtan bolsa kerek ushırasıw waqtında olardıń ilimge bolǵan qızıǵıwshılıǵı, bilimliligi hám shaqqanlıqları bergen sorawlarınan hám pikirlerinen ayqın kórinip turdı. Akademik Sh.A. Ayupov Ózbekstan matematika iliminiń tereń tamır urǵan bayteregi sıpatında, elimiz iliminiń keleshegi bolǵan bolajaq jas ilim nálshelerine óziniń ilim jolındaǵı toplaǵan tájiriybeleri, ilim jolınıń mashaqatları hám abzallıqları haqqında keń túsinikler berdi.
Ushırasıw mektep pitkeriwshilerinde tereń tásir qaldırıp, olardıń ilimge bolǵan qızıǵıwshılıqların jáne de arttırdı.

K.U.Begjanova PhD,     
QMU, Funkcionallıq analiz, algebra
hám geometriya kafedrası docent