Xalqımızda «Bir perzentke jeti máhálle ata-ana» degendey, bul sózde tereń filosofiyalıq máni bar. Búgin jaslardıń tálim-tárbiyası, olardı jedellik penen ámelge asırılıp atırǵan reformalarǵa biyparıq bolmay, milliy hám ulıwma insanıylıq qádiriyatlarımızǵa sadıq etip tárbiyalaw áhmiyetli máselelerdiń biri esaplanadı.

Usı jıl 18-may kúni Dene mádeniyatı fakultetinde nuranıy ustazlar menen birgelikte «Qızlar tárbiyasında analardıń roli» atamasında úgit-násiyat ilajı bolıp ótti. Ilajdıń maqseti student-qızlar arasında tálim-tárbiya máselesi, kelin bolıp, balalı bolıp, tálim alıp atırǵan student-qızlarǵa, kelinsheklerge jol joba kórsetiw bolıp tabıladı. Ilajda nuranıy ustazlarımız qızlarǵa ózleriniń ómir jolı, miynet iskerligi, ómirdiń ashshı hám dushshı kúnleri, sabırlılıq haqqındaǵı tárbiyalıq másláhátlerin berdi.

Ushırasıw qızǵın soraw-juwaplarǵa bay boldı. Bunday ilajlar jaslarımızdıń keleshekte óz ornın tabıwına, milliy mentalitetimizge say hám baxıtlı shańaraq uytqıları bolıwına járdem beriwi sózsiz.

G.Óskinbaeva

Dene mádeniyatı fakultetiniń hayal-qızlar máseleleri boyınsha dekan másláhátshisi