Sanaat texnologiyası fakultetinde «Korrupciyanıń aldın alıw hám oǵan qarsı gúresiw» atamasında ilaj bolıp ótti. Ilajǵa fakultet dekanı R.Qurbaniyazov, dekan orınbasarı Sh.Musirov, Yuridika fakulteti studentleri J.Abdullaev, A.Usmanov, S.Isakov, D.Egamberdiev, fakultet tyutorlar hám student jaslar qatnastı. Ilajdı fakultet dekanı R.Qurbaniyazov kiris sóz benen ashtı hám alıp bardı. Ol óz sózinde Ózbekstan Respublikası Jınayat kodeksinde korrupciya shólkemlesken jınayatshılıq, para alıw, para beriw hám para alıw beriwde dáldalshılıq etiw, sonday-aq, xızmetkerdi para berip ózine qaratıp alıw túrindegi jınayatlar kórsetilgenligin atap ótti hám bulardıń ishinde eń kóp ámeliyatta ushırasatuǵını paraxorlıq jınayatları yaǵnıy, JK 210-statyası para alıw, 211-statyası para beriw, 212-statyası para alıw-beriwde dáldalshılıq qılıw, 213-statyasında xızmetshini para esesine awdırıw jınayatları ekenligin bildirdi. Sonday-aq, korrupciyaǵa qarsı gúresiw boyınsha elimizde islenip atırǵan is ilajlar haqqında toqtalıp ótildi. Bunnan soń, Yuridika fakultet studenti J.Abdullaev sózge shıǵıp,  2016-jıl 13-dekabr kúni «Korrupciyaǵa qarsı gúresiw haqqında» ǵı Ózbekstan Respublikası nızamı (2017-jıl 3-yanvar, 419-sanlı) Senat tárepinen maqullanıp, 2017-jıl 4-yanvardan baslap kúshge engizilgenligi, sonıń menen birge, usı nızam tiykarında bul jaman illetke qarsı elimizde bir qansha ilajlar ótkerilip atırǵanlıǵı haqqında aytıp ótti. Bul nızam 6 bap, 34 statyadan ibarat bolıp, nızamnıń maqseti korrupciyaǵa qarsı gúresiw tarawındaǵı qatnasıqlardı tártipke salıwdan ibarat.