Nókis qalasında joqarı oqıw orınları studentleri arasında «Jańa Ózbekstan jasları, birleseyik!» súreni tiykarında festival ótkerilmekte. Festival sheńberinde Berdaq atındaǵı Qaraqalpaq mámleketlik universitetinde bos jumıs orınları yarmarkası ótkerildi. Onda Nókis qalası hám barlıq qala rayonlardan jumıs beriwshi kárxana hám shólkemlerden wakiller, student-jaslar qatnastı.
Ilajdı universitet rektorı A.Reymov kiris sóz benen ashtı. Ol óz sózinde búgingi kúnde elimizde jaslardıń joqarı bilim alıp, ózleriniń qánigelikleri boyınsha jetik kadrlar bolıp jetilisiwleri ushın jaratılǵan imkaniyatlar haqqında keń túrde maǵlıwmatlar berip ótti. Sonday-aq, búgingi bos jumıs orınları miynet yarmarkasında, bos jumıs orınları menen qatnasıp atırǵan mákeme-kárxana hám shólkemlerdiń basshılarına universitet jámááti atınan óz minnetdarshılıǵın bildirdi.
Bunnan soń, Qaraqalpaqstan Respublikası Kámbaǵallıqtı qısqartıw hám bántlik ministrligi bólim baslıǵı Sh.Ataev, Jaslar isleri agentligi Qaraqalpaqstan Respublikası basqarması qánigesi A.Ayımbetovlar sózge shıǵıp, Húrmetli Prezidentimiz tárepinen mámleketimizde eńgizilip atırǵan reformalardı ámelge asırıwda zamanagóy bilimge iye bolǵan jas kadrlardı jetilistiriw olardıń bántligin támiyinlew oǵada áhmiyetli ekenligin aytıp ótti.
Búgingi ótkerilgen bos jumıs orınları miynet yarmarkasına Nókis qalasındaǵı barlıq joqarı oqıw orınlarınan 1000 nan aslam studet-jaslar qatnasıp, sonnan 272 student-jaslar menen jumıs beriwshiler ortasında jumısqa qabıllaw boyınsha úsh tárepleme shártnamalar dúzildi.
Maǵlıwmat ushın student-jaslardıń bántligin támiyinlew maqsetinde ótkerilgen bos jumıs orınları miynet yarmarkasında 85 mákeme, kárxana hám shólkemler ózleriniń 472 bos jumıs orınları menen qatnastı.
QMU baspasóz xızmeti
