Házirgi kúnde Berdaq atındaǵı Qaraqalpaq mámleketlik universiteti bir neshe shet el joqarı oqıw orınları menen xalıqaralıq birge islesiw jumısların alıp barmaqta. Usı jıldıń 5-iyun kúni Geografiya hám tábiyiy resurslar fakulteti professor-oqıtıwshıları tárepinen 2022-jıldan baslap ámelge asırılıp atırǵan Yaponiya hám Ózbekstan joqarı oqıw orınları, sonday-aq ilimiy-izertlew institutları menen birgeliktegi «Satreps» joybarı jumısları boyınsha Yaponiyanıń joqarı oqıw ornları professor-oqıtıwshıları universitetimizge keldi. Dáslep miymanlar universitetimizdiń Xalıqaralıq birge islesiw boyınsha prorektorı T.Nurımbetov penen ushırastı. Yaponiyalı ilimpazlar usı joybardıń házirgi kúndegi áhmiyeti, shorlanıw, shólge qarsı gúresiw, suwsızlıq hám ekologiyalıq mashqalalar boyınsha dúnyanıń kópshilik elleri menen birge islesip kiyatırǵanlıǵın, onıń unamlı nátiyjeleri haqqında, sonday-aq, bul tarawda jas ilimpazlar: magistr hám doktorantlardı tayarlawda keńnen járdem beretuǵınlıǵın hám bul boyınsha keń kólemde grantlar ajıratılatuǵınlıǵın aytıp ótti. T.Nurımbetov bunday ilimiy-izertlew tarawında xalıqaralıq birge islesiw boyınsha universitetimiz hámiyshe tayar ekenligin, bunday joybarlarda universitetimiz olar menen birge islesip atırǵanlıǵınan minnetdar ekenligin hám keleshekte bunday joybarlarda birge islesiwdi dawam ettiriw kerekligin aytıp ótti.
Bunnan keyin Geografiya hám tábiyiy resurslar fakultetinde «Satreps» joybarı qatnasıwshıları menen birgelikte xalıqaralıq ilimiy seminar shólkemlestirildi. Ilimiy seminardı fakultet dekanı N.Embergenov ashıp berdi hám miymanlardı tanıstırdı. Seminarda Yaponiyalı ilimpazlardan professor Takanori Nagano, professor T.Xujanazarov hám doktorant Lyu Xaochenler «Shorlanǵan topıraqlardı izertlew» jumısları boyınsha ózleriniń bayanatları menen qatnastı. Sonday-aq, usı joybarda fakultet tárepinen qatnasıp kiyatırǵan professor-oqıtıwshılardan P.Reymov, N.Mamutov, V.Statov, Ya.Xudaybergenov, O.Sultashova hám doktorant A.Keunimjaevalar da joybardaǵı ilimiy-izertlew jumısları haqqında aytıp, pikir almastı. Seminar barısında Yaponiyalı ilimpazlar shorlanǵan topıraqlarda ilimiy-izertlew jumısların alıp barıwda zárurli bolǵan Electroconductometr úskenesin joybar qatnasıwshılarına sawǵa etti. Seminar sońında qatnasıwshılar joybar sheńberinde Qaraqalpaqstan Respublikası topıraqlarınıń shorlanǵan sharayatında galofit ósimliklerdi ósiriw hám olardı kartalastırıw boyınsha keleshekte islenetuǵın jumıslar haqqında pikir alıstı.
Geografiya hám tábiyiy resurslar fakulteti dekanı N.J.Embergenov
