Xabarıńız bar usı jıldıń 7-9-iyun kúnleri aralıǵında Berdaq atındaǵı Qaraqalpaq mámleketlik universitetinde barlıq fakultetlerde oqıw jılı juwmaǵı boyınsha ata-anaları menen ushırasıw keshesi bolıp ótpekte. Ushırasıwda universitet rektorı, prorektorlar, fakultet dekanları, dekan orınbasarları qatnaspaqta.

Usı tiykarda búgin universitet rektorı A.Reymov Yuridika fakultetinde bolıp, studentlerdiń ata-anaları menen sáwbetlesiw alıp bardı. Ol óz shıǵıp sóylewinde, studentlerdiń kiyiniw mádeniyatı, tártip-intizamı, ádep-ikramlıq qaǵıydaları, internet tarmaqlarınan aqılǵa muwapıq paydalanıwı kerekligi hám jat ideyalardan ózlerin qorǵaw máseleleri boyınsha sáwbetlesip, ata-analardıń pikir hám usınısların tıńladı.

Sonday-aq, sáwbetlesiw barısında búgingi kúnde universitetimizde student-jaslarǵa jaratılǵan imkaniyatlar, olardı kásipke baǵdarlaw, bilimlendiriwdiń sapasın arttırıw, til úyreniw, korrupciyaǵa qarsı gúresiw, studentlerdiń sabaqqa qatnası, bos waqıtların mazmunlı ótkeriw boyınsha islenip atırǵan jumıslarǵada toqtaldı. Sonıń menen birge keleshegimiz bolǵan jaslardı tárbiyalawda, olardıń óz kásibinıń mamanı bolıp jetilisiwinde studentlerdiń ata-analarına aldaǵı waqıtlarda birgelikte islesiwge shaqırdı.

A.Nurlıbaev

Qaraqalpaq filologiyası hám jurnalistika fakulteti 

Málimleme xızmeti hám jámiyetshilik penen baylanıslar tálim baǵdarı studenti