Usı jıldıń 17 may – 6 iyun aralıǵında Berdaq atındaǵı Qaraqalpaq mámleketlik universitetiniń bir topar professor-oqıtıwshıları óz-ara xalıqaralıq birge islesiw shártnaması tiykarında Rossiya Federaciyasınıń Qazan Federal Universitetinde «Global dúnyada zamanagóy universitettiń básekiligin arttırıw («Повышение конкурентоспособности современного университета в глобальном мире») baǵdarı boyınsha qánigeligin jetilistiriw kursında oqıp qayttı.
Qazan (Волга бойы – Приволжский) federal universiteti tek Rossiya Federaciyasınıń emes, al, sonday-aq dúnya júzilik joqarı reytingli joqarı oqıw orınları qatarına kiretuǵın universitet esaplanadı. Atap aytqanda, bul universitet lingvistika baǵdarı boyınsha dúnyadaǵı 100 likke, al anıq ilimler baǵdarı boyınsha 300 likke kiretuǵın joqarı oqıw ornı esaplanadı.
QMU wákilleriniń Qazan kalasına saparı «Adımnar-Qazan» mámleketlik avtonom ulıwma bilim beriw mákemesinde oqıw processiniń shólkemlestiriliwi, oqıwshılarǵa jaratılǵan sharayatlar menen tanısıwdan basladı. Bul jerde professor-oqıtıwshılarımız «Ámeliy oqıtıwdıń zamanagóy texnologiyaları» (Современные технологии практического обучения) baǵdarlaması boyınsha usı jıldıń 17-21 may kúnleri oqıdı. Bunnan tısqarı universitet wákilleri «Adımnar-Qazan» mektep-internatınıń «Qosımsha tálim orayı» (Центр дополнительного образования) jumısı menen de tanıstı.
Qazan federal universiteti quramında 19 institut bolıp, bul qánigeligin jetilistiriw hám tájiriybe almasıw saparınıń keyingi basqıshı «Filologiya hám mádeniyatlarara qatnasıqlar (Институт филологии и межкультурных коммуникации)» institutında ótkerildi.
Qánigeligin jetilistiriw kursı «Ilimiy ilajlardı shólkemlestiriwdiń zamangóy texnologiyaları» (Современные технологии организации научных мероприятий), «Instituttıń bilim beriw missiyası» (Образовательная миссия института), «Zamanagóy universitettiń bilim beriw xızmetleriniń marketingi» (Маркетинг образовательных услуг современного университета), «Kafedrada kásipke baǵdarlaw jumısınıń shólkemlestiriliwi» (Организация профориентационной работы на кафедре), «Ilim hám bilim ushın elektron maǵlıwmat resursları» (Электронные информационные ресурсы для науки и образования), «Tiykarǵı ilimiy metrikalıq kórsetkishler hám olardıń qollanılıwı» (Основные наукометрические показатели и их применение), Dúnya júzilik iqtiboslik indeksleri: Scopus hám Web of Science» (Мировые индексы цитирования: Scopus и Web of Science), «Akademiyalıq kommunikaciyalar tiykarları» (Основы академической коммуникации), «Xalıqaralıq konferenciyalarda qatnasıw hám top jurnallarda basıp shıǵarıw tájiriybesinen» (Из опыта участия в международных конференциях и публикации в топовых журналах), «Kafedranıń ilimiy-izertlew iskerligi» (Научно-исследовательская деятельность кафедры), «Ilimiy basılımdı tayarlawdıń teoriyası hám ámeliyatı» (Теория и практика подготовки научной публикации), «Akademiyalıq xat (Structure/ Coherence and Cohesion), «Tyurkologiya: tariyx hám házirgi kún”, «Filologiya hám mádeniyatara qatnasıq institutındaǵı tárbiya hám sociallıq jumıslar haqqında», «Qospa tálim baǵdarlamaları – QFU «Filologiya hám mádeniyatara qatnasıq institutı» tájiriybesi» baǵdarlamaların óz ishine qamtıdı. Oqıw processi instituttıń basshı xızmetkerleri hám jetekshi qánigeleri tárepinen alıp barıldı.
Kurs sonında tıńlawshılardı institut direktorı filologiya ilimleriniń doktorı, professor Radiy Rifkatovich Zameletdinov qabıl etip, Qazan federal universiteti hám Qaraqalpaq mámleketlik universiteti arasındaǵı óz-ara qarım-qatnasıqlardıń házirgi jaǵdayı hám keleshektegi rejelerine toqtap ótti. Sonday-aq tıńlawshılarǵa jumıslarında, kurs juwmaǵı boyınsha joybar jumısların qorǵawda tabıslar tiledi.
Juwmaqlastırıp aytqanda, xalıqaralıq kólemde óz ornına iye Qazan federal universitetine saparı barısında óz qánigeligin jetilistirgen Qaraqalpaq mámleketlik universiteti professor-oqıtıwshılarınıń zamanagóy dúnya júzilik talaplarga tiykarlanǵan jańa oqıtıw usılları, kriteriyaları, jańasha oqıw processin shólkemlestiriw sıyaqlı bilimlendiriw sapasın jaqsılawǵa qaratılǵan kónlikpelerdi ózlestiriwi hám alǵan tájiriybelerin is júzinde qollanıwı, universitetimizde oqıw processin, ulıwma respublikamızda bilimlendiriw tarawın bunnan bılay da rawajlandırıwǵa, bilim sapasın arttırıwǵa keleshekte tiykar boladı. Ámelge asırılǵan bunday isler óz gezeginde Berdaq atındaǵı Qaraqalpaq mámleketlik universiteti hám Qazan federal universiteti arasındaǵı xalıqaralıq birge islesiw nátiyjesiniń ayqın kórinisi boladı.
QMU «Rus tili hám ádebiyatı»
kafedrası baslıǵı: doc. N.Sh.Karimxodjaev
