Usı jıldıń 15-iyun kúni Qaraqalpaqstan Respublikası Ministrler Keńesi Baslıǵınıń orınbasarı A.Daniyarov hám Qubla Koreya Respublikasınıń jetekshi KIDL kompaniya wákillerinen ibarat delegaciya Berdaq atındaǵı Qaraqalpaq mámleket universitetinde boldı. Dáslep, delegaciya aǵzaların universitet rektorı A.Reymov hám universitet administraciyası kútip alıp, óz-ara sáwbetlesiwler alıp bardı. Ushırasıwda rektor A.Reymov búgingi kúnde universitette tálim-tárbiya hám ilimiy izertelew boyınsha ámelge asırılıp atırǵan jumıslar, atap aytqanda, házirgi waqıtta universitette oqıp atırǵan studentlerdiń úlesi, ekonomikanıń jetekshi tarawları ushın joqarı maman qánigeler tayarlaw hám olardıń jumıs penen bandligi, universitettiń Ózbekstan Respublikası hám shet el joqarı oqıw orınları hám ilimiy izertlew mákemeleri menen birgelikte jumıs alıp barıwı, xalıq aralıq hám milliy reytinglerdegi ornı haqqında tolıq tanıstırıp ótti.
Ushırasıw dawamında Qubla Koreya Respublikasınıń jetekshi kompaniya wákillerinen ibarat delegaciya universitet hám bul mámleket joqarı oqıw orınları menen birge islesiwdi jáne de bekkemlew, aldaǵı waqıtları ekonomikanıń áhmiyetli tarawları ushın tájiriybeli qánigelerdi jetkeriw, ilim hám ilimiy izertlew nátiyjeliligin jáne de asırıwǵa xızmet etetuǵın bir qatar joybarlardı birgelikte ámelge asırıwda óz-ara pikirlesiwler alıp bardı.
