Usı jıldıń 20-iyun kúni Qaraqalpaq mámleketlik universiteti nuranıy professor-oqıtıwshıları hám universitet aymaǵındaǵı máhállelerde jasawshı nuranıylar arasında sporttıń shaxmat túri boyınsha “Rektor kubogi” ashıq turniri ótkerildi. Jarısqa universitet nuranıy professor-oqıtıwshıları hám máhállelerde jasawshı 20 dan aslam nuranıylar qatnastı. Jarıs qızǵın bellesiwlerge bay bolıp, olardıń oylaw qábileti, aqıldı shınıqtırıw jolları, ilimiy intellektuallıq potencialı sınaldı. Jarıs tájiriybeli sportshı, dene mádeniyatı teoriyası hám metodikası assistenti, tóreshiler A.Qazaqbaev, tyutor N.Aytniyazova hám bir topar ekspertler tárepinen ádil bahalanıp, erler arasında I-orındı Qurılıs fakulteti docenti N.Saparniyazov, II-orındı “Qurılısshı” MPJ turǵını R.Ayapbergenov, III-orındı “Qurılısshı” MPJ turǵını A.Zarekeevlar jeńip alǵan bolsa, al hayal-qızlar arasında I-orındı Shet tilleri fakulteti is júrgiziwshisi R.Jaqsımova, II-orındı Biologiya fakulteti docenti V.Davletmuratova, III-orındı Arxitektura fakulteti úlken oqıtıwshısı A.Abekeevalar jeńip alıwǵa miyasar boldı.
Jarıs jeńimpazları shólkemlestiriwshiler tárepinen tayarlanǵan diplomlar hám qımbat bahalı estelik sawǵaları menen sıylıqlandı. Ótkerilgen jarıstıń tiykarǵı maqseti shaxmat boyınsha qabıl etilip atırǵan húkimet qaralarınıń orınlanıwın támiyinlew, sonday-aq, máhálleler menen birge islesiwdi jáne de kúsheytiw, nuranıylarımızdıń qábiletlerin jaslarǵa úlgi etip kórsetiw hám de shaxmat sportın keńnen en jaydırıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiӯ boyınsha dekan orınbasarı
