Usı jıldıń 24-iyun kúni “OTUS” studentler ornitologiyalıq klubı menen birgelikte Kegeyli rayonında jaylasqan Aqtuba kóline ornitologiyalıq ekspediciya shólkemlestirildi. Bul ekspediciyanı shólkemlestiriwden tiykarǵı maqset Aqtuba kóliniń jazǵı ornitofaunasın úyreniw, sonday-aq, klub aǵzalarına qus túrlerin anıqlaw usılların úyretiw. Aqtuba kólinde alıp barılǵan ornitologiyalıq baqlaw nátiyjesinde Aqtuba kólinde 21 túrdegi 148 qus dizimge alındı. Sonı ayrıqsha atap ótsek boladı, Aqtuba kólinde baqlaw waqtında Ózbekistan Respublikası Qızıl kitabına kirgizilgen Aqquw Cygnus olor qusınıń eki danası dizimge alındı.
Ekspediciya dawamında kólde óz palapanların alıp júrgen Úlken suńgigir Podiceps cristatus L.,1758 qusınıń 3 toparın hámde hár bir toparda 2 palapannan bar ekenligi anıqlandı. Baqlaw dawamında Aqtuba kólinde eń kóp sanda ushırasqan quslarǵa Úlken súńgigir Podiceps cristatus, Almabas Netta rufina, Hind shımshıǵı Passer indicus hám Dárya shaǵalasın Sterna hirundo L., 1758 kiritsek boladı.
