Berdaq atındaǵı Qaraqalpaq mámleketlik universiteti Shet tiller fakulteti Inglis til bilimi kafedrası filologiya hám tillerdi oqıtıw (inglis tili) tálim baǵdarı pitkeriwshilerine diplom tapsırıw keshesi bolıp ótti. Onda universitet oqıw isleri boyınsha prorektor O.Dúysenbaev, Shet tiller fakulteti dekanı Dj.Kurbanbaev, inglis til bilimi kafedrası baslıǵı G.Djoldasova, professor-oqıtıwshılar, pitkeriwshi jaslar hám olardıń ata-anaları qatnastı. Ilajda universitet oqıw isleri boyınsha prorektor O.Dúysenbaev sózge shıǵıp, pitkeriwshi jaslardı qutlıqlap, olardıń hár biri jámiyette óz ornın tabıwı hám ustazları tárepinen berilgen bilimlerdi ámeliyatta qollana biliwine úlken isenim bildirdi hám pitkeriwshilerge saltanatlı túrde diplom tapsırdı.
Bunnan soń, Shet tiller fakulteti dekanı sózge shıǵıp, pitkeriwshi studentlerge óziniń shın júrekten tileklerin bildirip, olarǵa den-sawlıq, jıllar dawamında iyelegen bilimlerin el-jurtımız gúllep-rawajlanıwına úles qosıwda hesh sharshamawın, keleshektegi jumıslarında áwmet yar bolıwın tilep qaldı. Sonıń menen birge ilaj dawamında inglis til bilimi kafedrası docenti D.Xadjieva hám inglis til bilimi kafedrası baslıǵı G.Djoldasovalar shıǵıp sóylep pitkeriwshi studentlerge áwmet tilep, jaqsı qánigeler bolıp jetilisip, óz bilimlerin jas áwladqa jetkerip beriwine isenim bildirip, aq jol tiledi. Sonday quwanıshlı máwritlerde perzentleri quwanıshına sherik bolǵan ata-analar hám pitkeriwshi jaslar sózge shıǵıp, 4 jıl dawamında tálim-tárbiya bergen professor-oqıtıwshılarına shın júrekten minnetdarshılıq hám jıllı tileklerin bildirdi.
