Xabarıńız bar, 2023/2024 oqıw jılı ushın joqarı oqıw orınlarına qabıllaw boyınsha Mámleketlik test imtixanları usı jıldıń 1-avgust sánesinen 13-avgust kúnleri aralıǵında ótkeriliwi belgilengen. Usı tiykarda Berdaq atındaǵı Qaraqalpaq mámleketlik universitetiniń sport sarayı hám sport zalında test imtixanlarınıń ekinshi kúni dawam etpekte.
Test sınaqları ótkeriletuǵın obektler átirapında ata-analar ushın barlıq qolaylıqlar, sonday-aq, test sınaqları bolıp ótetuǵın orınlarda ádilik hám ashıq-aydınlıqtı támiyinlewge úlken itibar qaratılǵan. Usı imtixan processleri hám ata-analar menen sáwbetlesiw maqsetinde búgin Joqarı bilimlendiriw, ilim hám innovaciyalar ministrliginen kelgen wákil R.Xudayberganov Qaraqalpaq mámleketlik universitetinde boldı hám bul jerde ata-analar menen sáwbetlesip, barlıq abiturientlerge áwmet tiledi.
Bunnan soń, test sınaqları ótkeriletuǵın orınlarda universitet administraciyası basshılıǵında professor-oqıtıwshılar, isshi topar aǵzaları, volontyorlar tárepinen abiturientlerdiń ata-analarınıń pikir-usınısların, mashqalaların, sonday-aq, sociallıq keypiyatın úyreniw maqsetinde sorawnamalar ótkerildi.
QMU baspasóz xızmeti
