Xabarıńız bar, 2023-2024-oqıw jılı ushın joqarı oqıw orınlarına kiriw ushın test sınaqları bolıp ótpekte. Test sınaqları eki smenada, birinshi smena 08:00 den 11:00 ge shekem 2-smenada 15:00 den 18:00 ge shekem bolıp ótedi. Universitetiniń sport sarayı hám sport zalında ótkerilip atırǵan test sınaqlarında universitet administraciyası basshılıǵında professor-oqıtıwshılar, test sınaqlarına biriktirilgen juwaplı xızmetkerler, volontyorlar, jámiyetlik tártipti saqlaw, jol háreketi qáwipsizligin támiyinlewde Ishki isler ministrligi, Milliy gvardiya hám Ayrıqsha jaǵdaylar basqarması jánede densawlıqtı saqlaw ministrligi xızmetkerleri biriktirilgen.

Test sınaqları procesinde ata-analarǵa jaratılǵan sharayatlardı kózden ótkeriw maqsetinde búgin Joqarı bilimlendiriw, ilim hám innovaciyalar ministriniń birinshi orınbasarı K.Karimov Qaraqalpaq mámleketlik universitetinde boldı.

Test sınaqları ótkeriletuǵın obektler átirapında ata-analar ushın barlıq qolaylıqlar, sonday-aq, test sınaqları bolıp ótetuǵın orınlarda ádilik hám ashıq-aydınlıqtı támiyinlewge úlken itibar qaratılǵan. Test ótkeriletuǵın orınlarǵa kameralar ornatılıp, internet arqalı test2023.uz saytında onlayn baqlap barıw imkaniyatı jaratılǵan. Bul óz gezeginde ata-analar hám keń jámiyetshilik wákilleriniń test sınaqların  bahlap barıw imkaniyatın jaratıp beredi.

QMU Baspasóz xızmeti