Usı jıldıń 14-avgust kúni Rossiya Ilimler Akademiyası Sibir bólimi Esaplaw matematikası hám matematikalıq geofizika institutınıń «Stoxastikalıq máseleler» laboratoriyasınıń bas ilimiy xızmetkeri, fizika-matematika ilimleri doktorı, professor Anton Vaclavovich Voytishek penen Qaraqalpaq mámleketlik universitetide Matematika fakultetiniń professor-oqıtıwshıları, ziyrek magistrantları hám V. I. Romanovskiy atındaǵı Matematika institutı Qaraqalpaqstan bóliminiń ilimiy xızmetkerleri menen ilimiy ushırasıw bolıp ótti. Bul ushırasıwda professor A. V. Voytishek «Научные исследования и преподавание курсов по численному статистическому моделированию в новосибирском Академгородке (Россия)» atamasında bayanat jasadı.

Bayanatta A. V. Voytishek ilimiy toparınıń cifrlı statistikalıq modellestiriw boyınsha oqıw kursların, atap aytqanda, NMPUD (Numerical Modelling of Probabilistic Univariate Distributions) sisteması boyınsha ilimiy izertlewlerdi qollap-quwatlaw hám oqıw kursların ámelge asırıw ushın jańa kompyuterlik islenbeleri kórsetildi. Qatnasıwshılar ózleriniń qızıqtırǵan sorawlarına keńirek juwaplar aldı. Usınday ilimiy ushırasıwlar xalıq aralıq birge islesiwdiń bekkemleniwine tiykar boladı dep oylaymız.