Usı jıldıń 25-avgust kúni paytaxtımız Nókis qalasında Qaraqalpaqstanda 2023-2026 jıllarda turizmdi rawajlandırıw strategiyasınıń prezentaciyası ótkerildi. Ilajda Qaraqalpaqstan Respublikası Joqarǵı Keńesi Baslıǵınıń orınbasarı Rustem Saparbaev, Ministrler Keńesi Baslıǵınıń orınbasarı – Turizm hám mádeniy miyras ministri Rasul Zarikeev, Germaniya birge islesiw shólkeminiń wákilleri Beate Shorayt, Nikol Xoysler hám Yulian Felten, Tashkent mámleketlik Ekonomikalıq universitetiniń rektorı Qońıratbay Sharipov, Berdaq atındaǵı Qaraqalpaq mámleketlik universitetiniń rektorı Axmet Reymov, sonıń menen birge turizm tarawındaǵı isbilermenler, jergilikli ónermetler, mámleketlik muzey wákilleri hám basqa da bir qatar ministrlik hám mákemelerdiń wákilleri qatnastı.
Keń kólemde ótkerilgen bul ilaj dawamında dáslep, sózge shıǵıwshılar elimizdiń turistlik potencialı, turizm tarawın rawajlandırıw hám elimizge kóp sanlı turistler aǵımın tartıw boyınsha ámelge asırılıp atırǵan keń kólemli is-ilajlar, bul baǵdarda mámleketimiz basshısı tárepinen qabıl etilip atırǵan qarar hám pármanlar haqqında atap ótti.
Bunnań soń Germaniya xalıqaralıq birge islesiw shólkeminiń ekspertleri tárepinen Turizmdi rawajlandırıw strategiyası, Qaraqalpaqstannıń turistlik imkániyatları hám alǵa qoyılǵan rejeler haqqında prezentaciyalar ótkerildi.
Sonıń menen birge ilaj dawamında strategiyada belgilengen is-ilajlardıń ámelge asırılıwı dodalandı, bir qatar ilimiy shólkemler, turistlik kárxanalar, taraw ekspertleri, muzey wákilleri ózleriniń pikir hám usınısların bildirdi.
2023-2026 jıllarda Qaraqalpaqstanda Turizm tarawın turaqlı túrde rawajlandırıw strategiyası Qaraqalpaqstan Respublikası Turizm hám mádeniy miyras ministrligi hám Germaniya birge islesiw shólkeminiń baslaması menen tayarlandı. Derlik 100 betten ibarat bolǵan taraw ushın oǵada áhmiyetli bul hújjetti tayarlap shıǵıwda bir qatar ministrlik hám mákemeler, shólkemler hám birlespelerdiń wákilleri, jergilikli hám xalıqaralıq ekspertler qatnastı. Strategiyada búgingi kúnde Qaraqalpaqstanda bar bolǵan imkaniyatlar, aymaqtıń ózgeshe tárepleri, SWOT analiz, Ekoturizm hám onı rawajlandırıw boyınsha jol kartası, maqsetli kórsetkishler, aymaqta tarawdıń turaqlı rawajlanıwı, turistlik ónimdi islep shıǵıw hám basqa da kóplegen áxmiyetli wazıypalar belgilep berilgen.
Usı jıldıń 18-avgust kúni Tashkent qalasında Ózbekstan Respublikası Ekologiya, qorshaǵan ortalıqtı qorǵaw hám ıqlım ózegeriwi ministrligi, Germaniyanıń Ózbekstandaǵı elshixanası, Turizm komiteti, Qaraqalpaqstan Respublikası Ministrler Keńesi hámde Germaniya birge islesiw shólkeminiń ráasmiy wákilleriniń qatnasıwında Strategiyanıń prezentaciyası ótkerilip, onı ámelge asırıw boyınsha islep shıǵılǵan háreketler baǵdarlamasınıń joybarı dodalanǵan edi.
Óz gezeginde, sonı da atap ótiw tiyis, búgingi kúnde Qaraqalpaqstan Respublikası Turizm hám mádeniy miyras ministrligi tárepinen Germaniya birge islesiw shólkemi, MASCONTOUR xalıqaralıq shólkemi, YuNESKOnıń Ózbekstandaǵı wákilxanası, Evropa Awqamı kibi bir qatar xalıqaralıq shólkemler menen birgelikte elimizde turizm tarawın elede rawajlandırıw, xızmet kórsetiw dárejesin asırıw, turizm potencialın keń úgit-násiyat etiw, jas kadrlardıń qánigeligin jetilistiriw hám basqa da bir qatar jónelisler boyınsha joybarlar ámelge asırılıp kelinbekte. Mine usınday keń kólemli is-ilajlardıń nátiyjesinde Qaraqalpaqstanda turizm infrastrukturasın rawajlandırıw hámde elimizge keliwshi sırt elli turistler sanıń kóbeytip barıw rejelestirilgen.
Maǵlıwmat sıpatında 2023-jıl basınan Qaraqalpaqstanǵa 100 ge jaqın mámleketlerden 70 mıńnan aslam sırt elli turistlerdiń keliwi támiynlendi. Turistlik aǵım kóp bolǵan Evropa mámleketlerinen Italiya, Franciya, Germaniya hám Rossiya Federaciyası mámleketlerine tuwra kelse, ótken jılǵa salıstırǵanda bıyıl Shveycariya, AQSh, Niderlandiya mámleketlerinen keliwshi turistler sanı 2 esege kóbeydi. Al Salvador, Tayvan, CHili, Peru, Kosta-Rika, Kipr, Keniya, Islandiya mámleketleri puqaralarınıń sayaxat qılıw ushın Qaraqalpaqstandı tańlawı, turizm geografiyasınıń keńeyiwin kórsetpekte.
