Aldın xabar bergenimizdey, búgin, Berdaq atındaǵı Qaraqalpaq mámleketlik universitetinde jańa 2023/2024 oqıw jılı baslandı. Usı múnásibet penen universitet rektorı A.Reymov jańa oqıw jılında universitetke oqıwǵa qabıl etilgen studentlerdiń ata-analar menen ushırastı. Onda universitetimiz oqıw isleri boyınsha prorektorı O.Dúysenbaev, jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov, oqıw metodikalıq basqarması baslıǵı, Sh.Eshmuratovlar qatnastı.
Ushırasıwda rektor A.Reymov ata-analar menen sáwbetlesip, Húrmetli Prezidentimizdiń bilimlendiriw tarawına bolǵan ayrıqsha itibarı, jaslardıń joqarı bilim alıwları ushın kórsetip atırǵan ǵamxorlıǵı, sonday-aq, universitetimizde, oqıp bilim alıwı ushın studentlerge barlıq múmkinshilikler jaratılǵanlıǵı haqqında aytıp ótti.
Bunnan soń, sózge shıqqanlar universitetimizdiń studentler turar úylerindegi sharayatlar, hemis oqıw dástúri, kredit-modul sisteması h.t.b. máselelerge toqtalıp, olar boyınsha tolıq maǵlwmatlar berip ótti. Ushırasıw dawamında ata-analar ózleriniń pikir usınısların bildirip, qızıqtırǵan sorawlarına juwaplar aldı.
