Ózbekstan Respublikası Ǵárezsizliginiń otız eki jıllıǵı, sonday-aq, jańa 2023/2024 oqıw jılınıń baslanıwı menen Berdaq atındaǵı Qaraqalpaq mámleketlik universiteti rektoratı tárepinen studentler úyindegi jaslar ushın koncert baǵdarlaması shólkemlestirilip, bayram dasturxanı jayıldı. Ilajda universitet prorektorları, nuranıy ustazlar, fakultet dekanları, dekan orınbasarları, tyutorlar hám student-jaslar qatnastı. Dáslep, universitet rektorı A.Reymov sózge shıǵıp, Watanımız Ǵárezsizliginiń otız eki jıllıǵı hám 2023/2024 oqıw jılınıń baslanıwı «Bilimler kúni» bayramı menen barlıq student-jaslardı qızǵın qutlıqladı.
Sonıń menen birge, jaslardıń bilim alıwı, kásip-óner úyreniwi, mámleketimiz tárepinen jaratılıp atırǵan imkaniyatlar, tarawda ámelge asırılıp atırǵan reformalar, ásirese, jaslardıń bilim alıw ushın kóbirek ózleriniń imkaniyatları jánede bilimlerin jetilistiriwge xızmet etetuǵın kitaplardı oqıp barıwı, bos waqıtların mazmunlı ótkeriw boyınsha óz pikir-usınısların bildirdi. Bunnan soń, bayram ilajı, universitetimiz Kórkem óner fakultetiniń talantlı student-jasları tárepinen tayarlanǵan koncert baǵdarlaması menen dawam etti. Ilaj dawamında Nókis qalası Muxammed iyshan jome meshiti imam-xatibi B.Razov jańa oqıw jılında ámelge asırılıp atırǵan bunday iygilikli ilajlar jámiyetimizde tınıshlıq, doslıq, mehir-múriwbet, keńpeyillik ortalıǵın bekkemlewge xızmet etetuǵınlıǵın aytıp, bárshege óz minnetdarshılıǵın bildirdi.
QMU baspasóz xızmeti
