Búgin 8-sentyabr kúni Berdaq atındaǵı Qaraqalpaq mámleketlik universitetinde jańa 2023/2024 oqıw jılında republikamızdıń taraw basshıları menen student-jaslardıń ushırasıwı bolıp ótti. Onda Qaraqalpaqstan Respublikası prokurorı E.Tadjiev, Qaraqalpaqstan Respublikası Ishki isler ministri B.Tórebekov, Milliy gvardiya Qaraqalpaqstan Respublikası boyınsha basqarması baslıǵı M.Yusupov, Qaraqalpaqstan Respublikası Ayrıqsha jaǵdaylar basqarması baslıǵı A.Davletov, Nókis qalası hákimi A.Daniyarovlar qatnastı. Ushırasıwdı universitetimiz jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov ashıp berdi hám alıp bardı.
Bunnan soń, taraw basshılar sózge shıǵıp, mámleketimiz tárepinen bilimlendiriw sistemasında alıp barılıp atırǵan jumıslar, ámelge asırılıp atırǵan reformalar, jaslarımızǵa berilip atırılǵan imkaniyatlar haqqında aytıp ótti. Sonday-aq, sonǵı jılları mámleketimiz tárepinen jınayatshılıq hám huqıqbuzarlıqqa qarsı gúresiw, korrupciya hám huqıqbuzarlıqlardıń aldın alıwǵa qaratılǵan is-ilajlardı jetilistiriw jumıslarına da ayrıqsha itibar qaratılıp atırǵanlıǵı, biraq elde kópshilik jaslar ózleri jınayatqa bilip bilmey aralasıp qalıp atırǵanlıǵın, bunday unamsız halatlarǵa jol qoymay, óz ústinde islep, bilim alıp, mámleketimizdiń rawajlanıwına úles qosatuǵın jetik kadrlar bolıp jetilisiwi kerekligin atap ótti. Ushırasıw dawamında student-jaslar jınayatshılıqtı boldırmaw hám onıń aldın alıw boyınsha ózleriniń pikir usınısların bildirdi.
QMU baspasóz qızmeti
