Búgin 11-sentyabr kúni Qaraqalpaq mámleketlik universitetinde belgili pedagog-ustaz, kórnekli alım, pedagogika ilimleriniń kandidatı, professor, Greciyanıń «Áyyemgi dúnya» («Antik dúnya») xalıqaralıq akademiyasınıń akademigi Perdebay Shılmanov penen ushırasıw bolıp ótti. Ushırasıwǵa Dene mádeniyatı fakulteti dekanı N.Kaypov, jaslar menen islesiw boyınsha dekan orınbasarı R.Óteniyazov, professor P.Shılmanov, NMPI “Ulıwma pedagogika hám psixologiya” kafedrası baslıǵı T.Utebaev, NMPI “Dene tárbiyası” kafedrası baslıǵı A.Niyazov, tyutorlar hám 1-kurs studentler qatnastı.
Ushırasıwda bayanatshılar búgin kún qaharmanı, professor P.Shılmanovtıń 15-sentyabr tuwılǵan kúni, yaǵnıy onıń 80 jıllıǵı menen qızǵın qutlıqladı. Sonday-aq, ustazdıń tuwılıp ósken awılı, studentlik jılları, ámelge asırǵan jumısları, oqıtqan shákirtleri, onıń Qaraqalpaqstan Respublikası, qalaberse Ózbekstan Respublikası sportı tarawınıń rawajlanıwına qosqan úlesleri, Qaraqalpaq balalar milliy oyınların izzertlewdegi jemisli miynetleri, mámleketimiz tárepinen alǵan ataqları, ulıwma aytqanda ustazdıń basıp ótken miynet jolı, onıń úlgili shańaraǵı haqqında bayanatshılar tárepinen studentlerge oqıp esittirildi.
Studentler tárepinen ustazdıń úlgi alarlıq miynet hám ómir jolı haqqında qızıǵıwshılıq oyatıp professorǵa ózleriniń qızıqtırǵan sorawların berdi hám tiyisli juwapların aldı. Ótkerilgen ilajdıń tiykarǵı maqseti jaslardı ataqlı ilimpazlar menen ushırastırıw arqalı olardıń ruwxıy dúnyasın bayıtıw, olardıń miynet hám ómir jolın keńnen úgit-násiyatlap, tańlaǵan qánigeligi hám kásibiniń mamanı bolıp jetilisiwine kómeklesiw bolıp tabıladı. Ilimpazlardıń úlgili miynet jolı studentler ushın motivaciya bolatuǵınlıǵı sózsiz.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
