Búgin 23-sentyabr kúni Berdaq atındaǵı Qaraqalpaq mámleketlik universiteti rektoratı hám Kásiplik awqamı komiteti baslaması menen 1-oktyabr – Muǵallimler hám ustazlar kúni aldınan barlıq fakultet professor-oqıtıwshıları arasında «Univer Quiz» intellektual oyını ótkerildi.

Onda Joqarı bilimlendiriw, ilim hám innovaciyalar ministrliginiń Qaraqalpaqstan Respublikası aymaqlıq basqarması sektor baslıǵı B.Qalımbetov, universitet Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov, Kásiplik awqamı komiteti baslıǵı A.Alliyarovlar qatnasıp barlıq qatnasıwshılarǵa áwmet tiledi.

«Univer Quiz» intellektual oyının ótkeriwden tiykarǵı maqset professor-oqıtıwshılarıdı intellektual oyınlarǵa ele de qızıqtırıw hám jámlew, olardıń bos waqıtların mazmunlı ótkeriw, bilim hám logikalıq pikirlew qábiletin rawajlandırıw hám xoshametlew bolıp tabıladı ‑ deydi universitet Kásiplik awqamı komiteti baslıǵı A.Alliyarov.

Ótkerilgen intellektual oyınında barlıq fakultetlerden jámi 17 komanda qatnasıp, óz-ara bellesti. Oyın juwmaǵında 1-orındı Yuridika fakulteti komandası, 2-orındı Tariyx fakulteti komandası hám 3-orındı Kórkem óner fakulteti komandası iyeledi.