Búgin Berdaq atındaǵı Qaraqalpaq mámleketlik universitetinde qılıshpazlıqtıń sablya túri boyınsha Aziya oyınlarınıń jeńimpazları G.Perdebaeva hám D.Murzataeva qatnasıwında «Chempion hám jaslar» atamasında ushırasıw bolıp ótti. Onda Universitettiń hayal qızlar máseleleri boyınsha rektor másláhátshisi I.Seytnazarova, jaslar menen islesiw, ruwxıylıq hám aǵartıwshılıq isleri bólimi baslıǵı Q.Beknazarov, jeńimpaz sportshılardıń ata-anaları, ustazları hám student-jaslar qatnastı.
Ilajdı Dene mádeniyatı fakulteti dekanı N.Kaypov ashıp berdi hám basqarıp bardı. Ushırasıwda sózge shıqqanlar, sportshı qızlarımızdıń qolǵa kirgizgen jeńisleri menen qutlıqlap, aldaǵı ótkeriletuǵın jarıslarda tabıslar tiledi. Bunnan soń, jeńimpaz sportshılarımız sózge shıǵıp, ózleriniń sportqa kirip keliwi, onıń qıyınshılıqları, búgingi kúndegi jetiskenlikleri, haqqında jıynalǵanlarǵa keń túrde maǵlıwmat berip ótti.
Maǵlıwmat ushın; qılıshpazlıqtıń sablya túri boyınsha ótkerilgen Aziya oyınlarınıń final basqıshında Qaraqalpaq mámleketlik universiteti Dene mádeniyatı fakulteti studentileri Dilnaz Murzataeva jeke tártipte qola medalın al, komandalıq esapta Gúlistan Perdebaeva altın medaldı qolǵa kirgizdi.
Haqıyqatında da mámleketimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw hám jaslardı ǵalabalıq sportqa keńnen qamtıw boyınsha bir qatar reformalar ámelge asırılmaqta. Sonlıqtan da Húrmetli Prezidentimiz sport tarawına degen joqarı itibarı, tarawdıń materiallıq-texnikalıq bazasın bekkemlew, olardı hár tárepleme qollap-quwatlawdı kúsheytiw maqsetinde alıp barılıp atırǵan reformaları, álbette, tarawdıń rawajlanıwına, ásirese student jaslarımızǵa keń múmkinshilik jaratpaqta. Bunday jaratılǵan imkaniyatlardan universitetimiz student-jasları aqılǵa muwapıq paydalanıp, Solardan 1 Olimpida qatnasıwshısı, 4 Jáhán chempionı, 10 nan aslam Aziya chempionı, 130 dan aslam Ózbekstan chempionı jetilsip shıqtı.
