1-oktyabr – «Muǵallimler hám ustazlar kúni» bayramı múnásibeti menen búgin Qaraqalpaq mámleketlik universiteti student-jasları arasında sporttıń «Street workout» túri boyınsha jarıs ótkerildi. Jarısqa universitet studentlerinen ibarat 15 komanda (er balalar) qatnastı. Jarıs qızǵın bellesiwlerge bay bolıp, jaslardıń Street Workout sport túrine bolǵan qızıǵıwshılıǵı, olardıń sport (jarıs shártleri: (30 sekund ishinde) turnikke tartılıw, (30 sekund ishinde) brusyada qollardı búgip jazdırıw, (30 sekund ishinde) otırıp turıw, (30 sekund ishinde) jerde tayanıp jatıp, qollardı búgip jazdırıw) sheberlikleri sınaldı.
Jarısqa tájiriybeli sportshılar, dene mádeniyatı teoriyası hám metodikası kafedrası oqıtıwshıları N.Akimov, A.Qazaqbaev, S.Eliusinov, I.Auezovlar tóreshilik etti. Jarıs tóreshiler tárepinen ádil bahalanıp, er balalar arasında I-orındı kurash tálim baǵdarınıń 1-kurs, 110-topar studentleri, II-orındı dene mádeniyatı tálim baǵdarınıń 1-kurs, 102-topar studentleri, III-orındı dene mádeniyatı tálim baǵdarınıń 2-kurs, 209-topar studentleri jeńip alıwǵa miyasar boldı.
Sonday-aq, jarıs jeńimpazları hám Dene mádeniyatı fakulteti studenti Q.Muratov, Arxitektura fakulteti studenti Ǵ.Puxarbaev, Yuridika fakulteti S.Bozorovlar belsene qatnasqanlıǵı ushın shólkemlestiriwshiler tárepinen tayarlanǵan estelik sawǵaları menen sıylıqlandı.
Ótkerilgen jarıstıń tiykarǵı maqseti studentler arasında sporttıń Street Workout túri boyınsha jarıs ótkeriw arqalı student-jaslar arasında salamat turmıs tárizin qáliplestiriw, universitet kóleminde bul sport túrin rawajlandırıw hám en jaydırıw, olardıń sport sheberligin asırıw, qábiletli sportshı studentlerdi anıqlaw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
