Aldın xabar bergenimizdey, Joqarı bilimlendiriw, ilim hám innovaciyalar ministrligi hám Jaslar siyasatı hám sport ministrligi tárepinen «Bes baslama olimpiadası» sheńberinde joqarı oqıw orınları studentleri arasında ǵalabalıq sport jarısların ótkeriw tártibi boyınsha qospa reje tastıyıqlanǵan edi.Usı tiykarda búgin 5-oktyabr kúni Berdaq atındaǵı Qaraqalpaq mámleketlik universitetinde «Bes baslama olimpiadası» sheńberinde voleybol, basketbol hám mini futbol boyınsha fakultetler aralıq jarıslarǵa start berildi.

Jarıslardıń ashılıw máresiminde prorektorlar, barlıq fakultet dekanları, professor-oqıtıwshılar hám student-jaslar qatnastı. Dáslep universitet rektorı A.Reymov sózge shıǵıp, Húrmetli Prezidentimiz baslaması menen mámleketimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw, jaslardı ǵalabalıq sportqa keńnen qamtıw boyınsha bir qatar reformalar ámelge asırılıp, atırǵanlıǵın aytıp ótti. Sonday-aq, bunday jaratılǵan imkaniyatlardan universitetimiz student-jaslarıda aqılǵa uǵras paydalanıp, Jáhán hám Aziya chempionları  bolıp jetilisip shıǵıp atırǵanlıǵı, ayrıqsha atap ótti. Bunnan soń, komandalar voleybol, basketbol hám mini futbol boyınsha óz-ara bellesti.

Ótkerilgen jarıstıń maqseti universitet studentleriniń ǵalabalıq túrde sport penen turaqlı shuǵıllanıwları ushın mexanizm jaratıw, sonday-aq, olar arasında salamat turmıs tárizine bolǵan unamlı múnásibetti rawajlandırıw maqsetinde ǵalabalıq sport jarıslardı ótkeriw arqalı studentlerden ibarat komandalardı qáliplestiriw bolıp tabıladı.