Qaraqalpaq filologiyası hám jurnalistika fakulteti Jurnalistika tálim baǵdarında jumıs alıp barıp atırǵan «Jas jurnalistler klubı»nıń náwbettegi ushırasıwında belgili publicist hám jámiyetlik isker Sharap Usnatdinovtıń dóretiwshiligi hár tárepleme sóz  etildi. Kesheni jurnalistika kafedrasınıń baslıǵı J.Marziyaev alıp bardı. Keshede Ózbekstan Jurnalistler awqamı aǵzası Rawaj Otarbaev publicisttiń ómiri hám dóretiwshilik jolı haqqında student-jaslarǵa keń túrde maǵlıwmat berip ótti. Bayanatshı óz sózinde: «Qaraqalpaq prozasında óz aldına bir tóbe «Kimge kesh, kimge tań sáhár», «Jurnalistikaǵa kirisiw», «Isbilermenlikke mirátnama», «Kórgenlerim hám kewildegilerim”, «Shayırdıń jaslıǵı», «Ibrayım Yusupov», «Sonǵı ańshı» hám “Dáw kempir» sıyaqlı iri kólemdegi shıǵarmaları kórkem ádebiyatımızdıń biybaha ǵáziynesine aylanıp úlgergeni haqıyqat» – dep publicisttiń dóretiwshiligine keń túrde toqtap ótti. Keshede student-jaslar ózleriniń qızıqtırǵan sorawlarına juwaplar aldı. Ushırasıw keshesi hár bir qatnsıwshıda úlken tásir qaldırdı.

Muxammed Qudaybergenov

QMU Málimleme xızmeti hám jámiyetshilik penen baylanıslar tálim baǵdarınıń 4-kurs studenti