Búgin Berdaq atındaǵı Qaraqalpaq mámleketlik universitetinde hayal-qızlar keńesi tárepinen 11-oktyabr – Xalıqaralıq qızlar kúni múnásibeti menen «Qızlar – millet keleshegi» súreni tiykarında «Seniń baslamań – seniń keleshegiń ushın» atamasında forum ótkerildi. Forumdı universitettiń jaslar máseleleri, ruwxıylıq-aǵartıwshılıq isleri boyınsha prorektor S.Alawatdinov ashıp berdi hám jıynalǵanlardı «Xalıqaralıq qızlar kúni» menen qutlıqladı. Bunnan soń, universitet rektorınıń hayal-qızlar máseleleri boyınsha másláhátshisi I.Seytnazarova sózge shıǵıp, hayal-qızlar keńesi iskerligi, sonday-aq hárbir belsendi qızlarımızdıń jetiskenlikleri haqqında aytıp, bársheni bayram menen qutlıqladı. Forumda universitette bilim alıp atırǵan ziyrek, qábiletli hám talantlı qızlardıń qol ónerleri kórgizbesi shólkemlestirilip, ilaj qatnasıwshıları bul jaslardıń dóretiwshilik miynetlerinen tayarlanǵan kórgizbe menen tanıstı.
Ilaj dawamında universitetimizdegi hárbir belsendi qızlarımızdıń jetiskenlikleri aytılıp, olardıń ata-analarına universitet rektoratı tárepinen minnetdarshılıq xatları tapsırıldı. Óz gezeginde ata-analar da quwanıshların bólisip, kewillerinen shıqqan jaqsı tileklerin bildirdi. Bul forumdı ótkeriwden tiykarǵı maqseti qızlardı hár tárepleme qollap-quwatlaw, olardıń kiyiniw hám sóylew mádeniyatın arttırıw, jaslarımızdıń sanasın túrli jat illetlerden qorǵaw, salamat turmıs tárizin úgit-násiyatlaw jáne olardı turmısqa tayarlaw bolıp tabıladı. Forum universitet jasları tárepinen tayarlanǵan koncert baǵdarlaması menen dawam etti.
