Dene mádeniyatı fakulteti student-jasları arasında jınayatshılıqtıń hám huqıqbuzarlıqlardıń aldın alıw hám de jaslar arasındaǵı unamsız illetlerge qarsı gúresiw maqsetinde hár bir akademiyalıq toparlarda profilaktikalıq úgit-násiyatlaw ilajı ótkerildi. Ilajǵa Dene mádeniyatı fakulteti jaslar menen islesiw boyınsha dekan orınbasarı R.Óteniyazov, Yuridika fakultetiniń «Street law» klubı studentleri H.Akmalov, A.Axmadov, D.Abduvasiev, N.Miksanova, A.Seksenbaeva, A.Dauletbaeva, Sh.Ziyadullaev, N.Oralbaev, E.Yuldashev, M.Abdumannopov, G.Baxıtgeldieva, Sh.Xayitmuradova, A.Jumabaeva, K.Erkinbaeva, N.Yaxiyaeva, fakultet tyutorları hám studentler qatnastı. Ilajda bayanatshılar urlıq islew, qumar oynaw, óz-ara jánjellesiw, zorlıq hám basım ótkeriw, jol háreketi qáwipsizligi qaǵıydaları, spirtli ishimlikler ishiw, kewil ashar orınlarǵa barıw, korrupciya, aldawshılıq, tonawshılıq, diniy ekstremizm, kiberjınayat, pirotexnika ónimlerin paydalanıw yamasa satıw, hár túrli náshebentlik, psixotrop zatlardı paydalanıw, satıw yamasa satıp alıw sıyaqlı jınayatlardıń awır aqıbetleri, olarǵa qollanılatuǵın nızam tiykarındaǵı sharalar boyınsha óz túsiniklerin berip ótti.

Studentler ózleriniń qızıqtırǵan sorawlarına tiyisli juwaplar aldı. Ótkerilgen ilajdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.

R.Óteniyazov

Dene mádeniyatı fakultetiniń

jaslar menen islesiw boyınsha dekan orınbasarı