Qaraqalpaqstan Respublikası pedagoglardı jańa metodikalarǵa úyretiw milliy orayında filologiya ilimleriniń doktorı, Ózbekstan hám Qaraqalpaqstan jazıwshılar awqamınıń aǵzası Perdebay Nurjanovtıń tuwılǵanına 60 jıl tolıwı múnásibeti menen ushırasıw keshesi ótkerildi. Ushırasıwǵa joqarı oqıw orınlarınıń hám pedagogikalıq oraydıń professor-oqıtıwshıları, tıńlawshılar qatnastı. Kesheni oray direktorı B.Dilanov ashtı hám alıp bardı.
Ilajda Qaraqalpaqstan jazıwshılar awqamınıń baslıǵı K.Karimov, professorlar Q.Járimbetov, Q.Orazımbetov, docent B.Genjemuratov, Qaraqalpaqstan xalıq jazıwshısı A.Abdiev hám basqalar shıǵıp sóylep, Perdebay Nurjanovtı yubiley jası menen qızǵın qutlıqlap, ilimiy jumısları, dóretiwshiligi haqqında keń túrde maǵlıwmatlar berilip, onıń bilimlendiriw tarawında jemisli miynet etken ilimpazlardıń biri ekenligi ayrıqsha atap ótildi.
Atap ótilgenindey P.Nurjanov ilimiy jumıslar menen shuǵıllanıw menen birge, respublikamızdıń ádebiy turmısına, Jazıwshılar awqamınıń ádebiyatımızdı rawajlandırıw boyınsha alıp baratırǵan jumıslarına belsene qatnasıp, ádebiyatımızdı xalıq arasında úgit-násiyatlaw boyınsha awqamnıń eń belsendi aǵzasına aylandı. Ádebiy sınshı sıpatında házirgi ádebiy sınnıń rawajlanıwına belgili úles qosıp atırǵan, onıń qálemine tiyisli hár qıylı ádebiy sın hám ilimiy janrdaǵı 250 ge shamalas maqalaları rus, ózbek, qaraqalpaq tillerinde jarıq kórdi.
P.Nurjanov Shımbay rayonındaǵı Taza jol APJ ǵa qaraslı «Qartjan» awılında tuwıldı. Ulıwma bilim beriw mektebin tamamlaǵannan soń Nókis mámleketlik universiteti filologiya fakultetiniń qaraqalpaq tili hám ádebiyatı bólimine oqıwǵa túsedi hám onı 1985-jılı «ayrıqsha» bahalar menen pitkeredi. Sol jıldan baslap P.Nurjanov Ózbekstan Respublikası Ilimler Akademiyası #araqalpaqstan bóliminiń N.Dáwqaraev atındaǵı til hám ádebiyat institutında miynet jolın baslaydı, kishi ilimiy xızmetker, úlken ilimiy xızmetker, ilimiy xatker lawazımlarında jumıs isleydi. 1988-1993-jılları Rossiya Ilimler Akademiyası M.Gorkiy atındaǵı Dúnya ádebiyatı ilim izertlew institutınıń dáslep stajyor-izertlewshisi, soń aspirantı boladı. Moskva qalasında jaylasqan bul institut bolajaq ilimpazdıń ómirinde áhmiyetli orın tutadı. P.Nurjanovtıń sol waqıtları usı instituta isleytuǵın belgili ádebiyatshı-ilimpazlar G.Lomidze, M.Parxomenko, N.S.Nadyarnıx, Kazbek Sultanov, Z.G.Osmanovalardıń, sonday-aq, M.Lomonosov atındaǵı Moskva mámleketlik universiteti professorı X.G.Koroǵlı hám taǵı basqalardıń lekciyaların tıńlawı, olar qatnasqan hám basqarǵan ilimiy seminar hám májilislerde bolıwı jas ilimpazdıń keleshektegi ilimiy miynetiniń qáliplesiwine tiykar boldı.
Atı atalǵan ilimiy izertlew institutında P.Nurjanov belgili ilimpaz Z.G.Osmanovanıń ilimiy basshılıǵında «T.Qayıpbergenovtıń «Qaraqalpaq dástanı» – qaraqalpaq ádebiyatında birinshi trilogiya» degen atamada kandidatlıq dissertaciya jumısı ústinde isleydi hám onı 1994-jılı tabıslı jaqlaydı. Burınǵı Awqam, hátteki, shet ellerge de ádebiyat tanıw boyınsha joqarı sapadaǵı ilimiy qánigeler tayarlaw boyınsha ataqlı dárgay bolǵan M.Gorkiy atındaǵı Dúnya ádebiyatı ilim izertlew institutınıń tolıq teoriyalıq kursınan ótiwi yubilyardıń keleshektegi ilimiy isleriniń baǵdarın belgilep berdi.
Ilimiy dárejeli qánigege aylanǵan ol respublikamızdıń pedagogikalıq hám ilimiy turmısına belsene qatnasa baslaydı. 1995-jıldan baslap Berdaq atındaǵı Qaraqalpaq mámleketlik universitetinde assistent-oqıtıwshı, docent, professor wazıypasın atqarıwshı lawazımlarında islep kelmekte. Ol jaslarǵa tálim-tárbiya beriw menen birge, ilimiy jumıstı da qosıp alıp bardı. Usınıń nátiyjesinde «Qaraqalpaq romanı poetikası. Syujet hám kompoziciya. 1970-2000-jj.» temasındaǵı doktorlıq dissertaciyasın 2020-jıldıń iyun ayında tabıslı jaqlaydı. P.Nurjanov hár qıylı ilimiy, ádebiy-sın janrındaǵı kóplegen miynetlerdiń, ilimiy-metodikalıq qollanbalardıń, kitaplardıń avtorı.
Ilajda ádebiyatımızdı ele de rawajlandırıw baǵdarında pikir-usınıslar bildirilip, qatnasıwshılar ózlerin qızıqtırǵan sorawlarǵa juwap aldı.
Qaraqalpaqstan xabar agentligi
