Berdaq atındaǵı Qaraqalpaq mámleketlik universitetinde «Ilimli hayal-qızlar jámiyet aynası» súreni tiykarında «XXI ásir ilim-pán hám bilimlendiriw tarawındaǵı hayal-qızlar, jetiskenlikler hám mashqalalar» atamasında ilimiy-ámeliy konferenciya bolıp ótti. Konferenciyaǵa respublikamızdıń JOO hám universitetimizdiń belgili ilimpaz, professor-oqıtıwshı hayallar hám ziyrek student-qızlar qatnastı.

Ilajdı jaslar máseleleri hám ruwxıy-aǵartıwshılıq isleri boyınsha prorektor S. Alawatdinov kiris sóz benen ashtı. Sońınan universitet rektorınıń hayal-qızlar máseleleri boyınsha másláhátshisi I.Seytnazarova hám yuridika ilimleri doktorı, professor E.Qutıbaeva shıǵıp sóylep, elimizdiń rawajlanıwında hayal-qızlardıń orını girewli bolǵanı ushın, ásirese ilimpaz hayal-qızlardıń salmaqlı úlesi anaǵurlım joqarı ekenligi atap ótilip bunda álbette bilimlendiriw sistemasındaǵı sońǵı jıllarda alıp barılıp atırǵan túpkilikli reformalardıń nátiyjesi bolǵanlıqtan maqtanısh penen tilge alındı.

Ilimiy-ámeliy konferenciyada Sociologiya kafedrası baslıǵı, filosofiya ilimleri doktorı professor A.Berdimuratova, Insan huqıqları sonıń menen birge mámleketlik huqıq hám basqarıw kafedrası docenti yuridika ilimleri boyınsha PhD S.Amaniyazova hám QMU magistrantı, prezident stipendiyası iyesi X. Utemuratovalar sociallıq áhmiyetke mashqala hám jetiskenliklerge baylanıslı bayanatları bárshede úlken qızıǵıwshılıq payda etti. Mámleketimiz boylap festival úlgisine kóterińki ruwxta dawam etip atırǵan konferenciya sheńberinde QMU ilimpaz hayal-qızlarınıń ilimiy miynetleri, student-qızlardıń qol miyneti dóretpeleri hám lipaslardan ibarat kórgizbeler názerine usınıldı. Konferenciya universitet student-jaslarınıń kórkem-mádeniy shıǵıwları menen juwmaqlandı.

QMU hayal-qızlar másláhát Keńesi