Usı jıldıń 27-28-oktyabr kúnleri Joqarı bilimlendiriw, ilim hám innovaciyalar ministrligi baslaması menen Termiz mámleketlik universitetinde shólkemlestirilgen seminar “Student-qızlardı milliy qádiriyatlar ruwxında tárbiyalaw” temasına baǵıshlandı. Bul seminarǵa Berdaq atındaǵı Qaraqalpaq mámleketlik universiteti hayal-qızlar máseleleri boyınsha rektor másláhátshisi I.Seytnazarova óz bayanatı menen qatnastı.

Seminarda student-qızlardı milliy qádiriyatlar ruwxında tárbiyalaw, kiyiniw mádeniyatı, milliy libaslardıń áhmiyeti, hayal-qızlar ushın psixologiyalıq hám huqıqıy másláhátler beriwge tiyisli is-ilajların jedellestiriw, “Qızlarjan” klubı iskerligin jolǵa qoyıw sıyaqlı máseleler talqılanıp, pikir-usınıslar bildirildi.

Sonday-aq, seminar dawamında hayal-qızlar másláhát keńesi baslıqlarınan quralǵan komandalar ortasında » Zakovat» intellektual oyını ótkerildi. Qızǵın bellesiwler nátiyjesinde 1-orındı Ándijan hám Jizzax wálayatlarınıń » Saodat»,  2-orın Qashqadárya hám Surxandárya wálayatları komandaları, al 3-orındı Qaraqalpaqstan Respublikasınıń «Qırıq qız urpaqları» komandası iyeledi.

«Milliy qádiriyatlar kúni» sheńberinde bolıp ótken student-qızlardıń milliy libaslarda shıǵıwları úlken tásirler qaldırdı. Seminardıń ekinshi kúninde ishki turizmdi rawajlandırıw maqsetinde Hakim ata Termiziy, Sultan Saodat kompleksi, “Qırıq qız sarayı”, “Kekildor ata” sıyaqlı tariyxıy esteliklerge zıyarat shólkemlestirildi. 

 QMU Hayal-qızlar keńesi.