Elimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw hám de jaslardı ǵalabalıq sportqa keńnen qamtıw boyınsha bir qatar reformalar ámelge asırılmaqta. Xabarıńız bar hayallar gúresi boyınsha Ózbekstan saylandı komandası quramında Qaraqalpaqstanlı palwan qızlarda bar. Atap aytqanda Dene mádeniyatı fakultetiniń 2-kurs studentleri, Aziya chempionatınıń 3-orın jeńimpazları, «New Uzbekistan» xalıqaralıq jarısınıń 1-orın chempionları, Ózbekstan Respublikasınıń bir neshe márte chempionları Sanduǵash Djenbaeva, Ulmeken Esenbaeva, Feruza Esenbaevalardı maqtanısh etsek arzıydı. 

2023-jıl 31-oktyabr kúni Dene mádeniyatı fakultetinde chempion qızlar menen ushırasıw bolıp ótti.

 

Ushırasıwǵa Dene mádeniyatı fakulteti dekanı N.Kaypov, jaslar menen islesiw boyınsha dekan orınbasarı R.Óteniyazov, tyutorlar hám student-qızlar qatnastı. Ushırasıwda qatnasıwshılar palwan qızlardı chempionlıq penen qutlıqlap, olardıń ómiri, sportqa kirip keliwi, erisken jetiskenlikleri hám chempionlıq sırları haqqında sóz etildi hám de studentler ózleriniń qızıqtırǵan sorawların berdi. Ushırasıwdı ótkeriwden maqset studentlerge motivaciya beriw, sporttıń hayallar gúresi túrin jáne de rawajlandırıw hám jaslar arasında keńnen en jaydırıw bolıp tabıladı.