Xabarıńız bar, búgin Berdaq atındaǵı Qaraqalpaq mámleketlik universiteti bas imaratı aldında «JAŃA ÓZBEKSTAN-DOSLÍQ BOSTANÍ» súreni astında milletler aralıq doslıq festivalı bolıp ótti. Onda Qaraqalpaqstan Respublikası Ministrler Keńesi Baslıǵınıń orınbasarı B.Otemuratov, Qaraqalpaqstan Respublikası Ministrler Keńesi Baslıǵınıń Jámiyetlik hám diniy shólkemler menen baylanıslar boyınsha orınbasarı R.Nurazizov, Respublika ruwxıylıq hám aǵartıwshılıq orayı Qaraqalpaqstan Respublikalıq bólimi baslıǵı T.Atamuratov, «Qazaq», «Rus», «Ukrain», «Túrkmen», «Koreec» mádeniy milliy oraylarınan bir qatar wákilller qatnastı. Sonday-aq, festivalda Polessk mámleket universiteti rektorı Valeriy Ivanovich Dunay miymanda boldı. Festivaldı universitet rektorı A.Reymov ashıp berdi. Ol óz shıǵıp sóylewinde mámleketimizde 130 dan artıq millet wákilleri bir shańaraq prezentlerindey bolıp, teń huquqlı hám óz-ara awızbirshilikte jasap, kiyatırǵanlıǵın, olardıń huqıq hám erkinlikleri, nızamlı máplerin támiyinlew, bilim alıwı, kásip-óner úyreniwi, mádentiyatları, úrip-ádet dástúrlerin saqlaw hám rawajlandırıw ushın mámleketimiz tárepinen barlıq shárayatlar jaratılıp berilgenligin aytıp ótti.
Bunnan soń, Qaraqalpaqstan Respublikası Ministrler Keńesi Baslıǵınıń orınbasarı B.Otemuratov sózge shıǵıp, Ózbekstan Respublikasında milletler aralıq hám diniy keń peyillik tarawında ámelge asırılıp atırǵan keń kólemli jańalanıwlar jámiyette milletler aralıq tatıwlıq, óz-ara húrmet, mehir-miriwbet, tınıshlıq hám tatıwlıqtı bekkemlew, sociallıq-ruwxıy ortalıqtı támiyinlew, búgingi kúnde xalıqtı razı qılıw ushın elimizde alıp barılıp atırǵan reformalar, unamlı nátiyjesin berip atırǵanlıǵın óz shıǵıp sóylewinde keltirip ótti. Sonıń menen birge, festival sheńberinde mádeniy milliy oraylardıń kórgizbesi hám universitetimizdiń belsendi student-jaslarınıń koncert baǵdarlaması jıynalǵanlardıń názerine usınıldı.
Haqıyqatında da mámleketimizde milletlerara tatıwlıq hám diniy kenpeyillik principleri qarar taptırıw, milletlerdiń hár tárepleme rawajlanıwı, olardıń milliy qádiryatların saqalap qalıw, úrip-ádet dástúrlerin rawajlanıwına mámleketimizde barlıq imkaniyatlar jaratılǵan bolıp bul óz gezeginde kóp milletli xalqımızdıń milletler aralıq taıwlıqtı bekkemlew Ana-Watanımızdıń elde gúllep jasnawına xızmet qıladı.
Festival sheńberinde student-jaslar tárepinen «Milliy qádriyatlardıń eń belsendi úgit-násiyatlawshısı», «Jas aspazlar» tańlawı, Psixologiyalıq treningler, Háyiw aytıw, bet ashar h.t.b salt-dástúrleri saxnalıq atqarıwı, xudojnikler kórgizbesi bolıp ótti.
QMU baspasóz xızmeti
