Búgin, Berdaq atındaǵı Qaraqalpaq mámleketlik universitetinde Filologiya ilimleriniń doktorı, Professor Ózbekstan hám Qaraqalpaqstan jazıwshılar awqamı aǵzası Perdebay Nurjanovtıń 60 jıllıq yubileyi múnásibeti menen “Házirgi qaraqalpaq filologiyasíníń áhmiyetli máseleleri” atamasında respublikalıq ilimiy-teoriyalıq konferenciya bolıp ótti. Onda ilimpazlar, professor-oqıtıwshılar, nuraniylar, student-jaslar hám ǵalaba xabar qurallarınıń wákilleri qatnastı. Konferenciyanı universitetimizdiń Ilimiy isler hám innovaciyalar boyınsha prorektorı I.Turdımambetov ashıp berdi hám alıp bardı. Ol óz sozinde elimizde ilimniń rolin kúsheytiw, ásirese, akademiyalıq ilimniń abıroyın arttırıw, ilim tarawınıń intellektual potencialın bekkemlew, talantlı jaslardı ilimge keńnen tartıw hám ilim jolında pidákerlik penen xızmet etken alımlardıń mashaqatlı miynetlerin qádirlew mámleketlik siyasatı dárejesine kóterilgenin aytıp ótti. Sonday-aq, bul tarawda barlıq kúsh-jigerin, bilimin hám ilimiy tájiriybesin jaslarǵa ayanbay úyretip kiyatırǵan Filologiya ilimleriniń doktorı, Professor Ózbekstan hám Qaraqalpaqstan jazıwshılar awqamı aǵzası Perdebay Nurjanovtıń miynetlerin ayrıqsha maqtanısh penen atap, onıń búgingi múbárek 60 jası menen qutlıqlap konferenciya jumıslarına tabıslar tiledi.
Bunnan soń, sózge shıqqanlar ustazdıń ómir jolı, ilimiy miynetleri, ilimiy–pedagogikalıq hám jámiyetlik–siyasiy jumıslardaǵı belsendiligi haqqında bayanat jasadı. Qaraqalpaq ádebiyatı kafedrası professorı, filologiya ilimleriniń doktorı, Perdebay Nurjanovtıń qaraqalpaq ádebiyattanıw iliminde jańasha bir ilimiy-izertlew baǵdarına tiykar saldı hám bul baǵdardaǵı ilimiy-izertlew miynetleri menen qaraqalpaq ádebiyattanıw iliminiń rawajlanıwına salmaqlı úles qosıp kelmekte. P.Nurjanov ilimiy jumıslar menen shuǵıllanıw menen birge, Respublikamızdıń ádebiy turmısına-Qaraqalpaqstan jazıwshılar awqamınıń ádebiyatımızdı rawajlandırıw boyınsha alıp baratırǵan jumıslarına belsene qatnasıp, ádebiyatımızdı keń xalıq jámiyetshiligi arasında úgit-násiyatlaw boyınsha Awqamnıń eń belsendi aǵzasına aylandı. Ádebiy sınshı sıpatında házirgi ádebiy sınnıń rawajlanıwına belgili úles qostı. Bunı onıń qálemine tiyisli hár qıylı ádebiy sın hám ilimiy janrdaǵı 250 ge shamalas maqalalardıń rus, ózbek, qaraqalpaq tillerinde jarıq kórgenligi dálilleydi.
Usı orında bizde universitet jámááti Ózbekstan hám Qaraqalpaqstan jazıwshılar awqamı aǵzası Perdebay Nurjanovtıń 60 jasqa tolǵan yubileyi menen qızǵın qutlıqlaymız! Ustazǵa bekkem densawlıq, shańaraǵına amanlıq, ilimiy-dóretiwshilik jumıslarında tabıslar tilep qalamız.
QMU baspasóz xızmeti
