Búgin, 10-noyabr kúni Kegeyli rayonı «Xalqabad» MPJ aymaǵında jaylasqan «Iyshan qala» tariyxıy kompleksinde «Mádeniy miyrasqa meniń úlesim!» atamasındaǵı Respublikalıq akciyasına start berildi. Hár ayda ótkeriliwi názerde tutılǵan bul akciya Qaraqalpaqstan Respublikası Mádeniy miyras basqarması, Qaraqalpaqstan Respublikası Prokuraturası hám Berdaq atındaǵı Qaraqalpaq mámleketlik universiteti baslaması menen shólkemlestirildi.

Bul akciyanı ótkeriwden tiykarǵı maqset – respublikamız aymaǵında jaylasqan tariyxıy-mádeniy miyras esteliklerin saqlaw, olardı keleshek áwladlarǵa jetkeriw, jaslarǵa olardıń kelip shıǵıw tariyxı haqqında úgit-násiyat jumısların alıp barıwdan ibarat. Akciya dawamında Tariyx fakulteti Arxeologiya kafedrası oqıtıwshısı S.Saypov tárepinen qatnasıwshılarǵa «Iyshan qala» kompleksiniń tariyxı, jaslardıń ruwxıy dúnyasın bayıtıw, milliy ózligimizdi asırap-abaylawda bul orınnıń tutqan áhmiyeti haqqında qımbatlı maǵlıwmatlar berildi, studentler tárepinen bul tariyxıy komplekstiń átiraplarına abadanlastırıw jumısları alıp barıldı. Akciyaǵa Tariyx fakulteti dekanınıń Jaslar máseleleri boyınsha orınbasarı Q.Najimov, fakultet tyutorları B.Esemuratova, G.Esboganova, Tariyx fakultetiniń 1-kurs studentleri hám Ǵalaba xabar quralları wákilleri belsene qatnastı.

Baxıtgúl Esemuratova,
Qaraqalpaq mámleketlik universiteti
Tariyx fakultetiniń tyutorı