Usı jıldıń 20-28-noyabr kúnleri aralıǵında Qaraqalpaq mámleketlik universiteti Ilimiy isler hám innovaciyalar boyınsha prorektorı I.Turdimambetovtıń ilimiy sapar menen Qubla Koreyanıń Seul qalasında. Ilimiy sapar dawamında Qubla Koreyanıń “YOUNGINSN CO. Ltd” kompaniyası menen universitet ortasında dúzilgen memorandum tiykarında kompaniya iskerligi menen jaqınnan tanısıw, birge islesiw baylanısların jáne de bekkemlew, sonday-aq, Seul qalasındaǵı basqa da joqarı oqıw orınları hám ilimiy izertlew institutlarınıń iskerligi tanısıw rejelestirilgen.
Ilimiy isler hám innovaciyalar boyınsha prorektorı I.Turdimambetov 22-noyabr kúni Qubla Koreyanıń Yonse universiteti direktor orınbasarı Dong Young Kang menen ushırasıw ótkerdi hám Yonse universiteti ilimiy-innovaciyalıq tarawdaǵı jetiskenlikleri, ilimiy izertlew laboratoriyaları iskerligi menen jaqınnan tanıstı. Ushırasıw juwmaǵı boyınsha ilimiy-innovaciyalıq tarawlarda birge islesiw, universitet laboratoriyalarınan birgelikte paydalanıw, professor-oqıtıwshılardı stajirovkalarǵa jiberiw sıyaqlı máseleler boyınsha birge islesiw haqqında memorandum dúzildi.
Maǵlıwmat ushın Yonse universiteti pútkil dúnya júzilik QS reytinginde eń jaqsı 100 joqarı oqıw orınları qatarında, Qubla Koreyada eń kúshli 3 universitet qatarına kiredi. Bunnan tısqarı, ilimiy sapar dawamında basqa da joqarı oqıw orınları hám ilimiy izertlew institutları menen birge islesiw baylanısların ornatıw boyınsha sóylesiwler alıp barıw kózde tutılǵan.
