Húrmetli Prezidentimiz tárepinen usı jıldıń 11-oktyabr kúni ótkerilgen videoselektor májiliste mámleketimiz boylap «Jasıl mákan» ulıwma milliy joybarın ámelge asırıw ilajları kórip shıǵılıp, 25-oktyabrden 1-dekabr kúnine shekem terek egiw jumısları járiyalanǵan edi.

Bul joybarda Qaraqalpaq mámleketlik universiteti jámááti hám student jasları usı wazıypalardan kelip shıǵıp 15-oktyabr kúninen baslap paytaxtımız Nókis qalası aymaǵında, sonday-aq, universitet átirapındaǵı bos jerlerge hár qıylı dekorativ, miywe nállerin otırǵızıw, jerlerdi jabayı shóplerden tazalaw, abadanlastırıw hám kóklemzarlastırıw sıyaqlı jumıslardı atqarıp kelmekte.

Usı tiykarda búginde universitet átirapında «Jasıl mákan» ulıwma milliy joybarı ótkerilip, onda universitetimizdiń professor-oqıtıwshıları, belsendi student-jasları hám texnikalıq taraw xızmetkerleri hár qıylı, dekorativ terek nállerin otırǵızıp, óz belsendiligin kórsetpekte.

Joybarda universitetimizdiń rektorı A.Reymovta qatnasıp, belgilengen orınlarda ámelge asırılıp atırılǵan ilajlardı kózden ótkerdi. Sonıń menen birge, jańa náller ushın orın tayarlaw, otırǵızılǵan nállerge suw quyıw, tereklerdi suwǵarıw, terek nálleriniń kútimi, tárbiyasın beriw hám úlkemizdi “Jasıl mákan”ǵa aylandırıw boyınsha bársheni belsendilikke shaqırdı.

«Jasıl mákan» ulıwma milliy joybarı sheńberinde dawam etip atırǵan ilajlar barlıq fakultetler kóleminde hár kúni ámelge asırılıp atırǵan bolıp, universitet jámááti hám studentleri ana tábiyatımızdıń gúllep-jasnawı, qorshaǵan ortalıqtıń abadanlasıwına múnásip úleslerin qospaqta.