Aldın xabar bergenimizdey, Qaraqalpaq mámleketlik universitetiniń ilimiy isler hám innovaciyalar boyınsha prorektorı I.Turdımambetov Qubla Koreya joqarı oqıw orınları menen xalıq aralıq baylanıslar ornatıw boyınsha Seul qalasında xızmet saparında bolıp turıptı. Usı jıldıń 25-noyabr kúni univesitettiń ilimiy isler hám innovaciyalar boyınsha prorektorı I.Turdımambetov hám de Qubla Koreyanıń Texnika universiteti direktorı, professor Bae You Suk penen ushırasıw bolıp ótti.  Ayrıqsha atap ótiw orınlı, Qubla Koreyanıń Texnika universiteti usı mámlekette jumıs alıp barıp atırǵan Hyundai, Kia hám basqa da usı sıyaqlı dúnyaǵa belgili islep shıǵarıw kompaniyaları ushın jetekshi qánigeler tayarlawǵa qánigelesken, IT tarawında professional maman kadrlar tayarlawshı joqarı reytingge iye abıroylı oqıw orınlarınıń biri esaplanadı.

Ushırasıw barısında usı joqarı oqıw ornı menen Qaraqalpaq mámleketlik universiteti ortasında ilim, bilimlediriw tarawları boyınsha kelesi waqıtta turaqlı túrde óz-ara birge islesiw, usı baǵdarlarda óz-ara tájiriybe almasıw hám birgelikte ilimiy innovaciyalıq izertlewlerdi alıp barıw haqqında memorandum dúzildi hám bul máseleler boyınsha óz-ara kelisimlerge erisildi.