Usı jıldıń 27-noyabrı kúni Berdaq atındaǵı Qaraqalpaq mámleketlik universitetinde Qaraqalpaq xalqınıń ullı shayırı Berdaq Ǵarǵabay ulınıń 196 jıllıǵına baǵıshlanǵan ádebiy keshe bolıp ótti. Onda Qaraqalpaqstan Respublikası Jazıwshılar awqamı aǵzaları, universitet professor-oqıtıwshılar, student-jaslar qatnastı.
Kesheni universitettiń Jaslar máseleleri hám ruwxıy–aǵartıwshılıq isleri boyınsha prorektorı S.Alawatdinov ashıp berdi. Ol óz sózinde óz zamanınıń qaharamanı eli-xalqına, keleshek áwladlarǵa ózinen biybaha miyras qaldırǵan tariyxıy tulǵa Berdaq Ǵarǵabay ulınıń 196 jıllıǵı menen jıynalǵanlardı qızǵın qutlıqladı.
Ilajda Qaraqalpaqstan Jazıwshılar awqamınıń baslıǵı K.Karimov, Qaraqalpaq ádebiyatı kafedrası docenti G.Toqımbetova, Qaraqalpaq ádebiyatı kafedrası tayanısh doktorantı A.Tilegenovalar sózge shıǵıp, Berdaq babamızdıń óz dáwirinde hár qanday zorlıq-zombılıqlarǵa qarsı turıp, jámiyettegi jaman illetlerdi áshkaralap, óz zamanlasların awızbirshilikli, márt bolıwǵa shaqırıp, ásirese, keleshek áwladtıń bilim alıwı ushın bar kúsh-jigerin xalıq ushın jumsaǵan mártlikleri pidayılıǵı haqqında aytıp ótti. Sonıń menen bir qatarda universitetimizdin belsendi studen-jasları tárepinen tayalanǵan koncert baǵdarlaması jıynalǵanlardıń názerine usınıldı.
Haqıyqatında da, Berdaq babamızdıń atın máńgilestiriw boyınsha Ǵárezsizlik jıllarında húkimetimiz tárepinen bir qatar iygilikli isler ámelge asırıldı. Bunıń ayqın mısalı retinde Qaraqalpaq mámleketlik universiteti, mádeniyatımız benen kórkem-ónerimizdiń aynası esaplanǵan Qaraqalpaq mámleketlik akademiyalıq muzıkalı teatrına ullı babamızdıń atınıń beriliwi, Berdaq atındaǵı Qaraqalpaq ádebiyatı tariyxı mámleketlik muzeyi, paytaxtımız Nókis qalasındaǵı payızlı orınlardıń birine babamız esteliginiń ornatılıwı – bulardıń barlıǵı xalqımızdıń mánawiyatına degen joqarı itibardıń kórinisi bolıp tabılıdı. Jáne bir áhmiyetli tárepi sonda, ullı shayır, oyshıl hám sóz zergeri Berdaq Ǵarǵabay ulınıń húrmetine 2004 – jıldan baslap «27-noyabr – Berdaq kúni» sıpatında keń túrde belgilenip kelinbekte.
Berdaqtıń ólmes shıǵarmaları kóplegen tuwısqan xalıqlar tillerine awdarılıp óz oqıwshılarınıń júreginde máńgi saqlanadı. Babamızdıń xalıq ushın qılǵan pidayılıǵı, onıń islegen qayırlı isleri, keleshek áwlad ushın qaldırǵan bay ádebiy miyrasları, ósip kiyatırǵan jas áwladqa ruwx hám kúsh-quwat baǵıshlawı sózsiz.
