Usı jıldıń 1-dekabr kúni Berdaq atındaǵı Qaraqalpaq mámleketlik universitetiniń “Ekologiya hám topıraqtanıw” kafedrasına akademiyalıq almasıw oqıw baǵdarlaması sheńberinde Qazaqstan Respublikası Jubanov atındaǵı Aqtóbe regionallıq universiteti úlken oqıtıwshısı, Raxima Bisalieva “Intergrativ bilim beriwde STEM texnologiyasınıń baǵdarları hám jetiskenlikleri” temasında sheberlik sabaǵın ótti. Onda Biologiya fakultetiniń professor-oqıtıwshıları, doktarantlar, 2,3,4-kurs student-jaslar qatnastı. Sheberlik sabaǵın ótkeriwden tiykarǵı maqset oqıtıwdıń eń aldınǵı metodlarınan paydalanıw, funkcional sawatlılıqtı asırıw, óz-ara tájriybe almasıw bolıp tabıladı.

Ushırasıwdı fakultet dekanı Ya.Ametov kiris sóz benen ashıp berdi hám STEM bilim beriw texnologiyasınıń funkcional sawatlılıqtı asırıwdaǵı rólin, tájriybe almasıwdıń áhmiyetli ekenligin aytıp ótti. Bunnan soń,R.Bisalieva STEM texnologiyasınıń biologiyalıq bilim beriwdegi ózgesheligin, házirgi waqıtta áhmiyetli bolıp sanalatuǵın kásiplik sheberlikti qáliplestiriwde STEM texnologiyasınıń tutqan ornın 3D maketler járdeminde túsindirip, óz tájiriybesi menen bólisti. Qatnasıwshılar ózlerin qızıqtırǵan sorawlarǵa juwaplar aldı.