Búgin 5-dekabr kúni Qıtay Xalıq Respublikasınıń ayrıqsha hám tolıq huqıqlı elshisi Yuy Czyun Qaraqalpaqstan Respublikasına saparı dawamında, Berdaq atındaǵı Qaraqalpaq mámleketlik universitetinde boldı.

Miymanlardı dáslep universitet rektorı A.Reymov kútip alıp, universitetimizdiń oqıw procesi bul jerde studentler ushın jaratılǵan qolaylıqlar, sharayatlar haqqında tanıstırıp ótti. Bunnan soń, miymanlar universitettiń Shet tilleri fakulteti student-jaslar menen ushırastı. Ushırasıw dawamında búgingi kúnde fakultette qıtay tilin úyrenip atırǵan student-jaslar menen sáwbetlesip, olar tárepinen Qıtay xalqınıń milliy qosıqları atqarıldı.

Sáwbetlesiw barısında, universitetimizde aldagı waqıtları studentler ortasında qıtay tilin úyretiwdi keńeytiw maqsetinde, volontyorlar tárepinen til úyretiw orayın shólkemlestiriw hám Qıtay Xalıq Respublikasınıń joqarı oqıw orınları menen tálim baǵdarları boyınsha ilimiy-izertlew iskerligin rawajlandırıw, sonday-aq, studentlerdiń akademikalıq almasıwı, sonıń menen birge, professor–oqıtıwshılardıń tájiriybe almasıwın jolǵa qoyıw, qıtay tilin úyreneip atırǵan student-jaslardıń jazǵı ámeliyatın Qıtay Xalıq Respublikasınıń joqarı oqıw ornılarında alıp barıwın shólkemlestiriw máseleleri átirapında sóylesildi.

Ushırasıw juwmaǵında Qıtay Xalıq Respublikasınıń ayrıqsha hám tolıq huqıqlı elshisi Yuy Czyun jıllı júzlilik penen kútip alǵanlıǵı ushın universitet jámáátine óz minnetdarshılıǵın bildirdi.

 QMU baspasóz xızmeti