Ózbekstan Respublikası Prezidentiniń 2017-jıl 14-mart kúngi «Huqıqbuzarlıq profilaktikası hám jınayatshılıqqa qarsı gúresiw sistemasın jáne de jetilistiriw is-ilajları haqqında»ǵı PQ-2833-sanlı qararına muwapıq hápteniń hár piyshembi kúni huqıqbuzarlıq profilaktikası kúni dep belgilengen. Usı múnásibet penen 6-dekabr kúni studentler turar jayında jasawshı Dene mádeniyatı fakultetiniń student-jasları arasında jınayatshılıq hám huqıqbuzarlıqtıń aldın alıw, oǵan qarsı gúresiw maqsetinde profilaktikalıq úgit-násiyatlaw ilajı ótkerildi.
Ilajǵa Dene mádeniyatı fakulteti dekanı N.Kaypov, jaslar menen islesiw boyınsha dekan orınbasarı R.Óteniyazov, QMU profilaktika inspektorı I.Erejepov, tyutorlar hám studentler turar jayında jasawshı student-jaslar qatnastı. Ilajda bayanatshılar studentler turar jayınıń ishki-tártip qaǵıydaları, qáwipsizlik qaǵıydaları, sociallıq tarmaqlardaǵı hár túrli buzǵınshı ideyalardı úgit-násiyatlaytuǵın toparlarǵa aǵza bolmaw, olardıń ideyaların qollap-quwatlamaw hám buzǵınshı kúshler tárepinen uyımlastırılıwı múmkin bolǵan is-háreketlerge qatnaspaw, urlıq islew, qumar oynaw, óz-ara jánjellesiw, zorlıq hám basım ótkeriw, jol háreketi qáwipsizligi qaǵıydaları, spirtli ishimlikler ishiw, kewil ashar orınlarǵa barıw, korrupciya, aldawshılıq, tonawshılıq, jınısıy qatnas hám qospashılıq, kiberjınayat, diniy ekstremizm, pirotexnika ónimlerin paydalanıw yamasa satıw, hár túrli náshebentlik, psixotrop zatlardı paydalanıw, satıw yamasa satıp alıw sıyaqlı jınayatlardıń awır aqıbetleri, olarǵa qollanılatuǵın nızam tiykarındaǵı sharalar boyınsha óz túsiniklerin berip ótti.
Ilaj dawamında studentler tárepinen júz bergen jınayatlar menen tanıstırıp ótildi hám bul boyınsha studentler ózleriniń qızıqtırǵan sorawlarına tiyisli juwaplar aldı. Ótkerilgen ilajdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiӯ boyınsha dekan orınbasarı
