Aldın xabar bergenimizdey, Berdaq atındaǵı Qaraqalpaq mámleketlik universitetinde Qaraqalpaqstan medicina xızmetkerleri arasınan shıqqan birinshi akademik hám Qaraqalpaq mámleketlik universitetiniń birinshi rektorı akademik Charjaw Abdirovtıń tuwılǵanına 90 jıl tolıwı múnásibeti menen eslew keshesi bolıp ótti.
Eslew keshesinde ustazdıń aǵayin-tuwısqanları, jaqınları hám shákirtleri, professor-oqıtıwshılar, student-jaslar hám ǴXQ wákilleri qatnastı. Dáslep, ilaj qatnasıwshıları ilimpazdıń ómiri hám dóretiwshilik jolı haqqında «Xalıq maqtanıshı» atlı Qaraqalpaqstan telekanalı tárepinen súwretke alınǵan hújjetli filmdi tamashaladı.
Kesheni universitet rektorı A.Reymov ashıp berdi hám alıp bardı. Ol óz shıǵıp sóylewinde ustaz akademik Ch.Abdirov ómiri dawamında kóp ǵana iygilikli islerge baslamashı bolıp, xalqımızǵa pidayı xızmet etkenligi, ol óziniń miynetkeshligi, talapshańlıǵı, joqarı dárejedegi bilimi arqalı xalıq abırayına eriskenligin ayrıqsha atap ótti.
Bunnan soń, Respublikalıq Ruxıylıq hám aǵartıwshılıq Orayınıń Qaraqalpaqstan Respublikası bólimi baslıǵı T.Atamuratov, Qaraqalpaq mámleketlik universiteti Nuranıylar Keńesi baslıǵı B.Abdikamalov, QMU Ulıwma biologiya hám fiziologiya kafedrası baslıǵı A.Matchanov, Respublikalıq Qaraqalpaq leprazoriyası bas shıpakeri Z.Nuratdinova, QMU Yarım ótkizgishler fizikası kafedrası baslıǵı Q.Ismaylov, ustazdıń inisi M.Abdirovlar akademik Ch.Abdirovtıń ómır jolı hám ilimiy-pedagogikalıq xızmetlerı haqqında bayanat jasadı. Ilaj universitet student-jasları tárepinen tayarlanǵan koncert baǵdarlaması menen dawam etti.
Haqıyqatında da Mámleketti – qúdiretli, milletti – ullı etetuǵın kúsh, bul – ilim-bilim, tálim hám tárbiya ekenligi dáliyl talap etilmeytuǵın haqıyqatlıq. Jańa Ózbekstanda ilim-bilimge itibar joqarı shıńǵa shıqtı desem qátelespegen bolamız. Usı orında óz isiniń haqıyqıy pidayısı bolǵan insan akademik Charjaw Abdirovtıń 90 jıllıq yubileyi menen universitetimiz jámááti atınan qızǵın qutlıqlaymız! Ustazımızdıń talapshańlıǵı, pidayılıǵı, onıń islegen qayırlı isleri, biziń qálbimizde máńgi saqlanıp qaladı.
QMU baspasóz xızmeti
