Yuridika fakulteti hayal-qızlar máseleleri boyınsha dekan másláhátshisi G. Qazaqbaevanıń shólkemlestiriwi menen usı jıldıń 20-dekabr sánesinde QMU 1-sanlı studentler turar jayında qızlar tálim-tárbiyasında analardıń orınına baǵıshlanǵan ushırasıw keshesi bolıp ótti.
Ushırasıwǵa Yuridika fakultetiniń belsendi student-qızları 2023/2024-oqıw jılında Ózbekstan Respublikası Prezidenti mámleketlik stipendiyası iyesi 4-basqısh yurisprudenciya tálim baǵdarı studenti Ayjamal Toqsanbaevanıń anası Saparova Bazargul Qurbaniyazovna hám sporttıń «Ózbek jawıngerlik óneri» túri boyınsha Aziya kubogı jeńimpazı fakultetimizdıń 2-basqısh studenti Ulzada Mamutovanıń anası Sernazarova Baǵdagúl Ospanovna miyman bolıp, student-qızlarǵa ózleriniń qızlar tárbiyasında nelerge itibar qaratıw lazımlıǵı haqqında bahalı pikirlerin bildirdi. Olar qızlarınıń jetiskenliklerine ruwxlandırıwshılıq tásiri menen birge ustazlarınıń bergen bilimleri ayırıqsha ekenligin aytıp ótti.
Tolqınlanıw, ájayıp sezimler, maqtanısh hám súysiniw kóz jaslarına sebep bolǵan ushırasıw ilajǵa qatnasqan student-qızlarǵa ómirlik tárbiya hám motivaciya bere aldı desek asıra aytqan bolmaymız. Ilaj sońında analarımızǵa fakultet tárepinen tayarlanǵan estelik sawǵaları inám etildi.
Yuridika fakulteti 113-topar jetekshisi N. Jaksılikova
