Respublika Ruwxıylıq hám aǵartıwshılıq orayı Qaraqalpaqstan bólimi tárepinen Qaraqalpaqstan Respublikası Pedagoglardı jańa metodikalarǵa úyretiw milliy orayında ushırasıw ótkerildi. Oǵan joqarı oqıw orınlarınıń professor-oqıtıwshıları, jurnalistler hám jazıwshılar, aǵartıwshılıq úgit-násiyatshıları, tiyisli ministrlikler menen uyımlardıń, kórkem óner hám mádeniyat tarawınıń qánigeleri, keń jámiyetshilik wákilleri, sonday-aq, bir qatar belsendi jaslar qatnastı.

Respublika Ruwxıylıq hám aǵartıwshılıq orayınıń bas qánigesi N.Shınnazarov, Berdaq atındaǵı Qaraqalpaq mámleketlik universitetiniń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov hám basqalar shıǵıp sóylep, usı jıl 22-dekabr kúni Prezidentimiz Sh.Mirziyoevtiń qatnasıwında Respublika Mánawiyat hám aǵartıwshılıq Keńesinde ótkerilgen májiliste belgilengen wazıypalar boyınsha qatnasıwshılardı tanıstırıp ótti.

Atap ótilgenindey, bul májilis mánawiyat, mádeniyat, kórkem óner tarawındaǵı jumıslarımızdı jáne de jetilistiriw boyınsha wazıypalardı belgilep bergen tariyxıy ushırasıw boldı. Sebebi, ilim, tárbiya hám bilimlendiriw, mánawiyat tiykarǵı másele bolıp tabıladı. Májiliste kórilgen tiykarǵı máselelerdi xalqımızǵa keńnen úgit-násiyatlawda ámelge asırılıwı zárúr bolǵan wazıypalar belgilep alındı. Májilis dawamında qatnasıwshılar ózleriniń pikir-usınısların bildirip, ózlerin qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi.
M.Habibullaevtıń túsirgen súwretleri