2022-jılı 7-mart sánesinde Prezidentimiz tárepinen PP-87-sanlı pármanı qabıl etildi. Bul párman boyınsha «2022-2026-jıllarda hayal-qızlardıń jámiyette ekonomikalıq, social hám siyasiy tarawlarda belsendiligin asırıw haqqındaǵı milliy baǵdarlama islep shıǵılǵan. Bul baǵdarlamanıń tiykarǵı maqset hám wazıypaları etip, hayal-qızlarımızdı hár tárepleme qollap-quwatlaw, sociallıq jaqtan mútájligi bar hayal-qızlarǵa kómeklesiwdi jáne de jetilistiriw, olardıń bilim alıwı ushın zárúr shárt-sharayatlardı jaratıp beriw, densawlıǵın bekkemlew hám hayal-qızlar arasında jınayatshılıqtıń hám huqıqbuzarlıqlardıń aldın alıw belgilengen.
Pármanda kórsetilgen wazıypalardıń orınlanıwın támiyinlew maqsetinde Berdaq atındaǵı Qaraqalpaq mámleketlik universiteti Yuridika fakulteti hayal-qızlar máseleleri boyınsha dekan másláhátshisi Qazaqbaeva Gúlbáhar hám fakulteti studenti Asanova Húrliman paytaxtımızdaǵı «Qurılısshı» MPJ nuraniyları, belsendi hayal-qızları, kóshe biy hayalları hám sociallıq qorǵawǵa mútáj hayallar menen ushırasıp, olar ushın seminar ótkerdi.
Ushırasıw dawamında qol-óneri menen shuǵıllanatuǵın hayal-qızlardıń iskerligi menen tanısıp, olardıń ele de dáramatlı bolıw derekleri haqqında usınısların berdi. Sonday-aq, nuraniy apalar menen búgingi kún hayal-qızlarınıń jámiyette tutqan ornı jetiskenlikler hám tárbiya hám shańaraq máseleleri boyınsha pikir alısıp, ásirese qızlar tárbiyasına tiyisli mashqalalardı kemeytiw maqsetinde birgelikte islesiw jolǵa qoyılatuǵın boldı. Bunda hár ayda bir márte usı MPJnıń jası úlkenleri menen ushırasıw shólkemlestirip, #Kempir_apam_násiyatları heshtegi tiykarında videorolikler tańlawı ótkerilip olardıń hár biri fakultet sociallıq tarmaq hám toparlarda turaqlı jaylastırılatuǵın boldı.
