Tártip intizam hám juwapkershilikti kúsheytiw, jınayatshılıqtıń aldın alıw – huqıqbuzarlıqlar profilaktikası nátiyjeliliginiń tiykarǵı faktorı bolıp esaplanadı. 2024-jıl 9-yanvar kúni Dene mádeniyatı fakulteti student-qızları arasında jınayatshılıq hám huqıqbuzarlıqtıń aldın alıw, oǵan qarsı gúresiw hám de olar arasında profilaktikalıq úgit-násiyatlaw jumısların alıp barıw maqsetinde «Hayal-qızlar arasında jınayatshılıq hám huqıqbuzarlıqtıń aldın alıw» atamasında profilaktikalıq úgit-násiyatlaw ilajı ótkerildi. Ilajǵa Nókis qalalıq ishki isler organları jumısların muwapıqlastırıw basqarmasınıń hayal-qızlar máseleleri boyınsha aǵa inspektorı A.Namenova, tyutorlar hám student-qızlar qatnastı.
Ilajda bayanatshılar Ózbekstan Respublikasınıń “Hayal-qızlarǵa basım ótkeriw hám zorlıq etiwden olardı qorǵaw haqqında”ǵı ÓRQ-561-sanlı Nızamı, Ózbekstan Respublikasınıń “Hayal-qızlar hám erkekler ushın teń huqıq hám de imkaniyatlar kepillikleri haqqında”ǵı ÓRQ-562-sanlı Nızamınıń mazmunı hám áhmiyeti, urlıq islew, óz-ara jánjellesiw, zorlıq hám basım ótkeriw, jol háreketi qáwipsizligi qaǵıydaları, spirtli ishimlikler ishiw, kewil ashar orınlarǵa barıw, korrupciya, aldawshılıq, tonawshılıq, diniy ekstremizm, jınısıy qatnas hám qospashılıq, kiberjınayat, pirotexnika ónimlerin paydalanıw yamasa satıw, hár túrli náshebentlik, psixotrop zatlardı paydalanıw, satıw yamasa satıp alıw sıyaqlı jınayatlardıń awır aqıbetleri, qısqı dem alıs kúnlerin tınıshlıq hám qáwipsiz ótkeriw, olarǵa qollanılatuǵın nızam tiykarındaǵı sharalar boyınsha óz túsiniklerin berip ótti.
Studentler ózleriniń qızıqtırǵan sorawlarına tiyisli juwaplar aldı. Ótkerilgen ilajdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.
N.Aytniyazova
Dene mádeniyatı fakulteti tyutorı
