Hár-jılı yanvar ayınıń ekinshi háptesinen soń dúnya júziniń 140 tan aslam mámleketinde suwda júziwshi quslardıń xalıq-aralıq qısqı sanaǵı ótkeriledi. Ózbekstanda bolsa bul ekologiyalıq tádbir hár-jılı Ózbekstan qusların qorǵaw jámiyetiniń baslaması menen ótkerilip kelinbekte. 

Usı jıldıń 13-21-yanvar kúnleri Berdaq atındaǵı Qaraqalpaq mámleketlik universiteti Biologiya fakultetiniń ornitolog oqıtıwshıları, tayanısh doktorantları, magistrantları hám Otus-studentler ornitologiyalıq klubı aǵzaları tárepinen Nókis qalası átirapında jaylasqan Ashshıkól kóline ekspediciya shólkemlestirildi. Ekspediciyaǵa 23 adam qatnastı.

Ekspediciyanıń tiykarǵı maqseti – suwda júziwshi quslardıń xalıq-aralıq qısqı sanaǵın ámelge asırıw hám olarǵa baqlaw júrgiziw bolıp tabıladı. Baqlaw dawamında Ashshıkól kólinde 17 túrge tiyisli 645 dana qus dizimge alındı. Olardıń ishinde Ózbekstan Respublikasınıń Qızıl kitabına kirgen 12 bas aq quw Cygnus olor,  162 bas jasılbas úyrek Anas platyrhynchos, 28 bas almabas uyrek  Netta rufina, 7 bas ápiwayı shaǵala Larus cachinnans hám basqa suwda júziwshi quslar ushırastı.

Yakub Ametov

Qaraqalpaq mámleketlik universiteti

Biologiya fakulteti dekanı,

biologiya ilimleri doktorı, professor