Búgin Berdaq atındaǵı Qaraqalpaq mámleketlik universitetinde Korrupciya – jaslar keleshegine qáwip etiwshi illet» atamasında úgit-násiyat ilajı bolıp ótti. Onda Qaraqalpaqstan Respublikası Ishki isler ministri, polkovnik B.Tórebekov, Qaraqalpaqstan Respublikası Joqarı sudı sudyası S.Dawletmuratov, Qaraqalpaqstan Respublikası Ádillik ministrliginiń juwaplı xızmetkeri K.Avezov, Qaraqalpaqstan Respublikası Ishki isler ministrliginiń tergew basqarması ayrıqsha áhmiyetli isler boyınsha tergewshisi A.Sariev, Joqarı bilimlendiriw, ilim hám innovaciyalar ministrliginiń Qaraqalpaqstan Respublikası aymaqlıq basqarması bas qánigesi Z.Dáwletnazarova hám universitetiń professor-oqıtıwshıları, student-jasları qatnastı.
Ushırasıwdı universitettiń oqıw isleri boyınsha prorektorı O.Dúysenbaev basqarıp bardı. Ushırasıwda sózge shıqqanlar korrupciyaǵa qarsı gúres hám onıń aldın alıwda dúnya júzinde, sonıń ishinde Ózbekstan Respublikasında da ayrıqsha dıqqat qaratılǵanlıǵın, korrupciya – jámiyettiń rawajlanıwına keri tásir etip qoymastan, elimizdegi háreket etip turǵan nızamlarǵa isenimsizlik payda etetuǵınlıǵın, usınday unamsız jaǵdaylarǵa qarsı gúresiw búgingi kún siyasatınıń áhmiyetli máseleleriniń biri ekenligin aytıp ótti. Sonlıqtanda bul illetke qarsı gúresiw eń aldı menen hár bir insannıń ózine baylanıslı ekenligin, korrupciyanın aldın alıwda jámiyetshilik qadaǵalawın kúsheytiw kerek ekenligin aytıp, bársheni bul jaman illetke qarsı gúresiwde biyparwa bolmawǵa shaqırdı.
Haqıyqatında da hár qanday rawajlanıwdıń tamırına balta uratuǵın illetlerdiń biri korrupciya bolıp esaplanadı. Elimizde usınday illetlerge qarsı gúresiw, olardıń aldın alıw máselesine ayrıqsha itibar qaratılıp, bul baǵdardaǵı nızamshılıq bazası da jetilistirilmekte. Usı tiykarda puqaralardıń juwapkershiligi de arttırılmaqta.
QMU baspasóz xızmeti
